नाशिक (इंडिया दर्पण वृत्तसेवा) – द्वारका परिसरातील भगतसिंग चौकात भरधाव अज्ञात वाहनाने दिलेल्या धडकेत ४० वर्षीय अनोळखी व्यक्ती ठार झाला. या अपघात प्रकरणी भद्रकाली पोलिस ठाण्यात गुन्हा दाखल करण्यात आला आहे.
पोलिस नाईक धाबळे यांनी याबाबत फिर्याद दाखल केली आहे. गेल्या रविवारी (दि.१०) सायंकाळच्या सुमारास हा अपघात झाला होता. अनोळखी इसम द्वारका परिसरातील भुयारी मार्गा समोरून भगसिंग चौकाच्या दिशेने पायी जात असतांना त्यास अज्ञात वाहनाने धडक दिली होती. या अपघातात त्याचा मृत्यू झाला. अधिक तपास सहाय्यक निरीक्षक सपकाळे करीत आहेत.
घरावर दगडफेक व वाहनांच्या काचा फोडल्या
नाशिक (इंडिया दर्पण वृत्तसेवा) – वृध्दाच्या घरावर दगड फेक करीत एकाने पार्क केलेल्या वाहनांच्या काचा फोडून नुकसान केल्याची घटना विनयनगर भागात घडली. याप्रकरणी मुंबईनाका पोलिस ठाण्यात गुन्हा दाखल करण्यात आला असून संशयितास पोलिसांनी अटक केली आहे.
अरबाज उर्फ सोनू शाफिक शेख (२६ रा.मोठा राजवाडा) असे अटक केलेल्या संशयिताचे नाव आहे. याबाबत ओमप्रकाश कुंजीलाल शर्मा (७३ रा.प्रभुदेव अपा.विनयनगर) यांनी फिर्याद दिली आहे. संशयिताने सोमवारी (दि.१८) अज्ञात कारणातून शर्मा यांच्या घरावर आणि आॅफिसवर दगडफेक केली. यावेळी संतप्त शेख याने सोसायटीच्या पार्किंगमध्ये लावलेल्या वाहनांच्या काचा फोडून नुकसान केले. पोलिसांनी तात्काळ संशयितास अटक केली असून अधिक तपास हवालदार म्हैसधुणे करीत आहेत.
