नाशिक (इंडिया दर्पण वृत्तसेवा) –राजेंद्र (नाना) सूर्यवंशी यांच्या सहकार्याने व नाशिक जिल्हा क्रिकेट असोसिएशनच्या वतीने आयोजित किशोर सूर्यवंशी मेमोरियल ट्रॉफी आंतर तालुका क्रिकेट स्पर्धेस रविवार १७ डिसेंबर पासून हुतात्मा अनंत कान्हेरे मैदान, गोल्फ क्लब येथे रंगणार आहे. या स्पर्धेचे हे सलग दहावे वर्ष आहे.
या टी-ट्वेंटी सामन्यांच्या स्पर्धेमुळे नाशिक जिल्ह्यातील तालुक्यातील खेळाडूंना जिल्हास्तरावर आपल्या कामगिरीचे प्रदर्शन करण्याची संधी मिळते. खास या स्पर्धेसाठी नाशिक जिल्हा क्रिकेट संघटनेच्या विविध निवड समिती सदस्यांनी जिल्ह्याच्या सर्व १५ तालुक्यात जाऊन निवडीची प्रक्रिया पूर्ण करून प्रत्येक तालुक्याचा अंतिम संघ निवडला आहे .जिल्ह्यातील सर्व १५ तालुक्यांनी या स्पर्धेत भाग घेतला असून प्रत्येकी दोन साखळी सामन्यानंतर बाद फेरीत प्रवेश करण्याची संधी आहे.
या स्पर्धेतील सामन्यांचा आनंद लुटावा व ग्रामीण भागातील खेळाडूंना प्रोत्साहन द्यावे असे नाशिक जिल्हा क्रिकेट संघटनेतर्फे नाशिकच्या सर्व क्रिकेट प्रेमींना आवाहन करण्यात येत आहे.
