इंडिया दर्पण ऑनलाईन डेस्क
मुंबईः नवी मुंबईतील डीवाय पाटील स्टेडियमवर खेळल्या गेलेल्या एकमेव सामन्यात भारतीय महिला संघाने इंग्लंडचा ३४७ धावांनी पराभव करून महिला कसोटी क्रिकेटच्या इतिहासातील सर्वात मोठा विजय नोंदवला आहे. भारताच्या विजयाची हिरो ठरलेल्या दीप्ती शर्मा हिने या सामन्यात एकूण ९ विकेट घेतल्या.
हा सामना जिंकण्यासाठी भारताने इंग्लंडला ४७८ धावांचे मोठे लक्ष्य दिले होते. याला प्रत्युत्तर देताना इंग्लंडचा संघ दुसऱ्या डावात १३१ धावांवर गारद झाला. एकदिवसीय कसोटीच्या तिसऱ्या दिवसाच्या पहिल्या सत्रात भारताने इंग्लंडच्या सर्व १० विकेट्स घेत सामना जिंकला. या सामन्याच्या पहिल्या डावात भारताने ४२८ धावा केल्या होत्या. भारताकडून शुभा सतीशने ६९, रॉड्रिग्जने ६८ धावा, यास्तिका भाटियाने ६६ आणि दीप्ती शर्माने ६७ धावा केल्या. प्रत्युत्तरात इंग्लंडचा संघ पहिल्या डावात केवळ १३६ धावाच करू शकला. भारताकडून पहिल्या डावात दीप्ती शर्माने ५.३ षटकात ७ धावा देत ५ बळी घेतले. पहिल्या डावाच्या जोरावर भारताने इंग्लंडवर २९२ धावांची मोठी आघाडी घेतली होती. भारताला इंग्लंडला फॉलोऑन देण्याची संधी होती; पण संघाने तसे केले नाही. यानंतर टीम इंडियाने आपला दुसरा डाव ६ गडी गमावून १८८ धावांवर घोषित केला.
तिसऱ्या दिवशी फलंदाजीला आलेल्या इंग्लंडला हा सामना जिंकून इतिहास रचायचा होता; पण इंग्लंडला तसे करता आले नाही. भारतीय गोलंदाजांनी तिसऱ्या दिवशी शानदार कामगिरी करत पहिल्याच सत्रात इंग्लंडच्या संपूर्ण संघाला पॅव्हेलियनमध्ये पाठवले. इंग्लंडचा संघ दुसऱ्या डावात २७.३ षटकात केवळ १३१ धावाच करू शकला. भारताकडून दीप्ती शर्माने ४ आणि पूजा वस्त्राकरने दुसऱ्या डावात ३ बळी घेतले. महिलांच्या कसोटीत तीनशेहून अधिक धावांचा विजय मिळवण्याची ही दुसरी वेळ आहे. यापूर्वी, कसोटी इतिहासातील सर्वात मोठा विजय नोंदवण्याचा विक्रम श्रीलंकेच्या नावावर होता. या संघाने १९९८ मध्ये पाकिस्तानचा ३०९ धावांच्या मोठ्या फरकाने पराभव केला होता. इंग्लंडविरुद्ध घरच्या मैदानावर भारताचा हा पहिलाच कसोटी विजय आहे.
पहिल्या डावात नाणेफेक जिंकल्यानंतर फलंदाजी करताना भारताने ४२८ धावा केल्या होत्या आणि कसोटी इतिहासातील पहिल्या डावातील ही दुसरी सर्वोच्च धावसंख्या आहे, तर कसोटीच्या पहिल्या डावातील ही भारताची सर्वोच्च धावसंख्या आहे. या सामन्यात, भारताने पहिल्या डावात ४.०९ च्या धावगतीने धावा केल्या आणि महिला कसोटीच्या इतिहासात ही पहिलीच वेळ होती, जेव्हा एखादा संघ ४.०९ पेक्षा जास्त धावगतीने धावा करण्यात यशस्वी झाला.
