नागपूर (इंडिया दर्पण वृत्तसेवा) – लग्नावरून परतणाऱ्यांची क्वालिस गाडी आणि ट्रकची धडक होऊन झालेल्या अपघातात सहा जण ठार झाले. काटोल तालुक्यात शुक्रवारी रात्री मध्यरात्रीच्या सुमारास ही घटना घडली. त्यात एक गंभीर जखमी झाला.
नागपुरात एका लग्नाचा कार्यक्रम आटपून सात जण क्वालिस गाडीतून काटोलकडे चालले होते. त्या वेळी समोरून येणाऱ्या ट्रकची आणि या गाडीची धडक झाली. क्वॉलीसमधील सहा जणांचा जागीच मृत्यू झाला, तर एकजण गंभीर जखमी झाला आहे. जखमीवर नागपुरातील शासकीय वैद्यकीय रुग्णालयात उपचार सुरू आहेत. या अपघातात क्वॉलीसचा चक्काचूर झाला आहे.
या अपघाताची माहिती मिळताच पोलिसांनी घटनास्थळी धाव घेऊन मदत केली. काही स्थानिकांनीही मदत केली. या अपघातात ट्रकच्या उजव्या भागाचंही मोठं नुकसान झालं.
