इंडिया दर्पण ऑनलाईन डेस्क
झारखंडमधील काँग्रेसचे राज्यसभा सदस्य धीरज साहू यांच्याकडे ३५४ कोटीहून अधिक नोटा जप्त केल्याची माहिती समोर आली आहे. प्राप्तिकर विभागाने बुधवारी तीन राज्यांतील त्याच्या अर्धा डझन ठिकाणांवर छापे टाकल्यानंतर जवळपास आता कारवाई संपली आहे. प्राप्तिकर विभागाने झारखंड आणि ओडिशातील बौद्ध डिस्टिलरीज प्रायव्हेट लिमिटेड (दारू उत्पादन कंपनी) वर छापा टाकला आणि कंपनीशी संबंधित परिसरातून ३० कपाटातून ३५४ कोटीहून अधिक नोटा जप्त केल्या. सलग पाच दिवस ही छाप्याची कारवाई सुरु होती. त्यातून अनेक धक्कादायक माहिती समोर आली आहे.
सूत्रांनी दिलेल्या माहितीनुसार, कोट्यवधी रुपयांच्या नोटा मोजण्यात आल्या; मात्र नोटांची संख्या जास्त असल्याने मशिन्सने काम करणे बंद केले. बौद्ध डिस्टिलरी प्रायव्हेट लिमिटेडमध्ये करचुकवेगिरीच्या संशयावरून प्राप्तिकर विभागाच्या अधिकाऱ्यांनी अनेक ठिकाणी छापे टाकले होते. प्राप्तिकर विभागाच्या टीमसोबत सीआयएसएफचे जवानही होते. बुधवारी छापा टाकण्यात आला आणि खात्याच्या अधिकाऱ्यांनी नोट मोजणी यंत्राचा वापर करून खरी रोख रक्कम तपासली, नोटा बँकेत आणण्यासाठी १५७ पिशव्या खरेदी केल्या होत्या, त्या कमी पडल्या. नंतर गोण्या आणण्यात आल्या. त्यात नोटा भरून ट्रकमध्ये ठेवल्या आणि बँकेत नेल्या.
धीरज साहू काँग्रेसचे नेते आहेत. ते उद्योजक आहेत. धीरज यांचे बंधू शिवप्रसाद साहू हेही खासदार होते. त्यांचे कुटुंब स्वातंत्र्यापासून काँग्रेसमध्ये आहे. धीरज साहू यांनी १९७७ मध्ये राजकारणात प्रवेश केला. १९७८ च्या ‘जेल भरो’ आंदोलनात ते तुरुंगात गेले होते. जून २००९ मध्ये ते पहिल्यांदा राज्यसभेवर निवडून आले. २०२० मध्ये ते प्रसिद्धीच्या झोतात आले. तेव्हा सर्वोच्च न्यायालयाने त्यांची निवडणुकीशी संबंधित याचिका फेटाळली. भाजपचे उमेदवार प्रदीप सोथनालिया यांनी त्यांच्या निवडणुकीला आव्हान दिले होते.
काँग्रेसने झटकले हात
भारतीय राष्ट्रीय काँग्रेसचा खासदार धीरज साहू यांच्या व्यवसायाशी काहीही संबंध नाही. केवळ तेच सांगू शकतात आणि त्यांनी स्पष्ट करायला हवे. आयकर अधिकार्‍यांनी त्याच्या ठिकाणाहून एवढ्या मोठ्या प्रमाणात रोकड कॅश जप्त केली जात आहे. असे सांगत काँग्रेसचे जयपाल रमेश यांनी हात झटकले.
