नाशिक (इंडिया दर्पण वृत्तसेवा)- माहेरून ५० लाख रूपये आणावेत या मागणीसाठी विवाहीतेचा मानसिक व शारिरीक छळ करण्यात आल्याचा प्रकार समोर आला आहे. महिलेने मागणी पूर्ण न केल्याने चारित्र्याचा संशय घेवून पतीने तिच्यावर अनैसर्गिक कृत्य केल्याचा आरोप तक्रारीत करण्यात आला आहे. याबाबत उपनगर पोलिस ठाण्यात सासरच्या मंडळीविरोधात गुन्हा दाखल करण्यात आला आहे.
उपनगर पोलिस ठाणे हद्दीत राहणा-या पीडितेने याप्रकरणी तक्रार दाखल केली आहे. पती अभिलाष विसपूते व सासरच्या सात जणांनी गेल्या वर्षी महिलेने माहेरून ५० लाख रूपये आणावेत अशी मागणी केली होती. विवाहीतेने पैसे आणण्यास नकार दिल्याने तिला वारंवार शिवीगाळ व दमदाटी करून मारहाण करण्यात आली. तसेच पतीने चारित्र्यावर संशय घेवून तिच्यावर अनैसर्गिक कृत्य केल्याचा आरोप तक्रारीत करण्यात आला आहे. अधिक तपास उपनिरीक्षक चौधरी करीत आहेत.
आर्थिक वादातून बेदम मारहाण
नाशिक (इंडिया दर्पण वृत्तसेवा)- आर्थिक वादातून टोळक्याने एकास बेदम मारहाण केल्याची घटना चौकमंडई भागात घडली. या घटनेत धारदार हत्यार व फायटरने मारहाण करण्यात आल्याने सदर इसम जखमी झाला असून याप्रकरणी भद्रकाली पोलिस ठाण्यात गुन्हा दाखल करण्यात आला आहे.
विकार शेख,सोहेल शेख व आफताब अशी गुन्हा दाखल करण्यात आलेल्या संशयितांची नावे आहेत. याबाबत इम्रान नजिर शेख (३६ रा.आशियाना पार्क वडाळा) यांनी याप्रकरणी तक्रार दाखल केली आहे. इम्रान शेख शुक्रवारी (दि.८) रात्री चौकमंडईत गेले होते. साधना हॉटेल भागात संशयित त्यास भेटले. यावेळी हात उसनवार दिलेल्या पैश्यांची मागणी केल्याने ही घटना घडली. शेख यांनी पैस्यांची मागणी केल्याने संशयित त्रिकुटाने त्यास शिवीगाळ करीत लाथाबुक्यांनी बेदम मारहाण केली. या घटनेत फायटर आणि धारदार हत्याराचा वापर करण्यात आल्याने शेख जखमी झाले असून अधिक तपास पोलिस नाईक धाबळे करीत आहेत.
