इंडिया दर्पण ऑनलाईन डेस्क
आजच्या काळात प्रेम नेमके काय असते ? आणि प्रेम कसे करावे ? याची जणू काही तरुणांना माहिती नाही किंवा विसर पडलेले दिसतो, एखादी तरुणी माझी झाली नाही तर कोणाचीच नाही, अशा भावनेतून ते तरुणीच्या जीव घेतात. अशा घटना अलीकडच्या काळात सर्रासपणे घडताना दिसून येत आहेत. विदर्भातील वर्धा जिल्ह्यात एका खेडेगावात अशीच खळबळ जनक घटना घडली असून यामुळे शरीरातील संताप व्यक्त होत आहे. सेलू तालुक्यातील एकतर्फी प्रेमातून एका २३ वर्षीय तरुणीची तिच्याच घसून घराबाहेर हत्या करण्यात आली आहे. दहेगाव (गोसावी ) येथेही भयानक घटना रात्रीच्या वेळी घडली आहे. यामुळे तणावाचे वातावरण असून ही हत्या नेमकी कोणत्या कारणामुळे घडली याचे कारण अद्याप समोर आले नाही. एकतर्फी प्रेमातून ही हत्या झाली असल्याची चर्चा ग्रामस्थांमध्ये सुरू आहे.
उपचारादरम्यान झाला मृत्यू
दहेगावच्या एका तरुण मुलीवर दुसऱ्या गावातील तरुणाची एक तर्फी खूप प्रेम होते, प्रत्यक्षपणे तो तिला फारसा भेटला नाही, मात्र दुरून दुरूनच तो तिच्या प्रेमामध्ये वेडा झाला होता, त्यातूनच त्याने हे भयानक कारस्थान केले असावे, असे म्हटले जाते एके दिवशी रात्रीच्या सुमारास नालवाडी येथील दोन तरुण दहेगाव गोसावी येथे आले. या दोन मुलांसोबत दोन तरूणी देखील होत्या. या दोन मुलींनी मृत मुलीच्या घराच्या गेटजवळून बाहेर येण्यासाठी आवाज दिला. घराबाबेर कोणीतरी आवाज दिल्याने तरूणी घराबाहेर आली. घराबाहेर अंगणात दबा धरून बसलेल्या तरूणांनी मागून येऊन चाकूने तरूणीच्या गळ्यावर सपासप वार केले. अचानकपणे काही कळण्याच्या आतच या तरुणीवर हा बेसावधपणे जीवघेणा हल्ला झाला, तिने आरडाओरडा झाल्यानंतर घरातील ग्रामस्थ बाहेर आले. मुलीला रक्तबंबाळ अवस्थेत पाहून हादरले तात्काळ जखमी युवतीला सेवाग्राम रुग्णालयात दाखल करण्यात आले. पण उपचारा दरम्यान युवतीचा मृत्यू झाला आहे. त्यामुळे हळहळ व्यक्त होत आहे.
गावकऱ्यांनी त्यांना पकडले
रात्रीच्या वेळी गावामध्ये सर्वत्र सामसूम वातावरण होते, त्याचा या तरुणांनी फायदा घेत त्या मुलीचे घर गाठले आणि तिच्यावर जिवघेणा हल्ला केला, तसेच कोणी धावून येण्याच्या आतच तेथून पळ काढण्याचा प्रयत्न केला. चाकूने वार करून पळ काढणाऱ्या दोन युवकांसह सोबतच्या दोन मुलींना गावकऱ्यांनी पाठलाग करत पकडले. गावकऱ्याांनी चौघांना पोलिसांच्या ताब्यात दिले आहे. दहेगाव गोसावी येथे या घटनेमुळे तणावाचे वातावरण निर्माण झाले. घटनेची बातमी गावात वाऱ्यासारखी पसरली त्यानंतर ग्रामस्थ पोलीस स्टेशन परिसरात गावकरी एकत्र जमले आणि कडक कारवाईची मागणी केली. या थरारक घटनेमुळे गावकऱ्यांमध्ये चांगलाच संताप व्यक्त आहे. या घटनेमुळे देखील आता महिला सुरक्षेच्या बाबतीत प्रश्न उपस्थित होत आहे. यापूर्वी देखील वर्धा जिल्ह्यात अशीच एक घटना घडली होती या घटनेत एका कॉलेज प्राध्यापिकेला जिवंत जाळले होते.
