इंडिया दर्पण ऑनलाईन डेस्क
मिझोराममध्ये झोरम राष्ट्रवादी पार्टी (झेएनपी) राज्यात मोठ्या विजयाकडे वाटचाल करत आहे. हा पक्ष ४० पैकी २६ जागांवर आघाडीवर आहे. सत्ताधारी मिझो नॅशनल फ्रंट (एमएनएफ) दहा जागांवर आघाडीवर आहे, तर काँग्रेस १ आणि इतर ३ जागांवर आघाडीवर आहे.
निवडणुकीपूर्वी आणि नंतरही येथे तिरंगी लढत होणार असल्याची चर्चा होती. एक्झिट पोलने त्रिशंकू विधानसभेचा अंदाजही वर्तवला होता; परंतु लालदुहोमा आणि त्यांच्या पक्षाने सर्व अटकळ फेटाळून लावल्या आहेत. या मोठ्या विजयानंतर लालदुहोमा आता मुख्यमंत्री बनण्याच्या तयारीत आहेत. प्रशासकीय अधिकारी ते राज्याचे मुख्यमंत्रिपदाचे दावेदार होण्यापर्यंतचा लालदुहोमाचा प्रवास इतका सोपा नव्हता. मिझोराममधील तरुणांमध्ये लालदुहोमा खूप लोकप्रिय आहे.
गेल्या काही वर्षांपासून ते मिझोरामच्या विकासाबद्दल आणि राज्याला काँग्रेस आणि एमएनएफपासून मुक्त करण्याबद्दल बोलत आहेत. लालदुहोमा हे १९७७ मध्ये आयपीएस झाले आणि त्यांनी गोव्यात पथक प्रमुख म्हणून काम केले. या काळात त्यांनी तस्करांवर अनेक कारवाया केल्या. यामुळे ते राष्ट्रीय माध्यमांमध्ये दिसू लागले.. त्यांचे चांगले काम पाहून १९८२ मध्ये त्यांना माजी पंतप्रधान इंदिरा गांधी यांचे सुरक्षा प्रभारी म्हणून नियुक्त करण्यात आले.
या कारणाने गेली होती खासदारकी
इंदिरा गांधी यांचे संरक्षक अधिकारी म्हणून काम केल्यानंतर अवघ्या दोन वर्षांनी लालदुहोमा यांनी १९८४ मध्ये राजकारणात प्रवेश करण्याचा निर्णय घेतला. १९८४ मध्ये ते खासदार झाले. त्यानंतर अवघ्या चार वर्षांनंतर १९८८ मध्ये काँग्रेसचे सदस्यत्व सोडल्यामुळे त्यांना लोकसभेतून अपात्र घोषित करण्यात आले. अशा प्रकारे पक्षांतर विरोधी कायद्यानुसार अपात्र ठरलेले लालदुहोमा हे पहिले खासदार ठरले.
झोरम राष्ट्रवादी पक्षाची स्थापना
काँग्रेस सोडल्यानंतर लालदुहोमा यांनी झोरम राष्ट्रवादी पक्षाची (झेडएनपी) स्थापना केली. २०१८ च्या मिझोरम विधानसभा निवडणुकीत झोरम राष्ट्रवादी पक्षाच्या नेतृत्वाखालील झोरम पीपल्स मूव्हमेंट युतीचे पहिले मुख्यमंत्रिपदाचे उमेदवार म्हणून त्यांची निवड झाली; मात्र त्यांनी विरोधी पक्षनेते म्हणून काम करण्याचे मान्य केले. २०२० मध्ये पक्षांतर विरोधी कायद्याचे उल्लंघन केल्याच्या आरोपावरून त्यांचे विधानसभेचे सदस्यत्व रद्द करण्यात आले. भारतातील राज्य विधानमंडळांमध्ये अशा प्रकारची ही पहिलीच घटना होती. २०२१ मध्ये झालेल्या पोटनिवडणुकीत ते पुन्हा सेरछिपमधून विजयी झाले.
