इंडिया दर्पण ऑनलाईन डेस्क
दिंडीत भरधाव कंटेनर घुसल्याने झालेल्या भीषण अपघातात ४ वारक-यांचा मृत्यू झाला तर ८ जण जखमी झाले आहे. संगमनेर तालुक्यातील घारगांव शिवारात ही घटना घडली. जखमी वारक-या उपचारासाठी रुग्णालयात दाखल करण्यात आले आहे. या अपघातात बाळासाहेब अर्जुन गवळी,बबना पाटीलबा थोरे, भाऊसाहेब नाथा जपे, ताराबाई गंगाधर गमे अशी मृतांची नावे आहेत.
या अपघातात समजलेली माहिती अशी की, शिर्डी येथील श्री महंत काशीकानंद महाराज यांची साई पालखी दिंडी देवाची आळंदी येथे जात होती. कंटनेरच्या चालकाला डुलकी लागल्याने त्याचा ट्रकवरील ताबा सुटला. त्यानंतर हा कंटनेर थेट दिंडीमध्ये घुसला. त्यानंतर या अपघातात ४ वारक-यांचा मृत्यू झाला तर ८ वारकरी जखमी झाले.
या अपघातानंतर स्थानिक नागरिकांनी मदत करत जखमींना रुग्णालयात दाखल केले. कंटेनर चालकाला पोलिसांनी ताब्यात घेतले आहे. संतप्त नागरिकांनी या कंटेनरची तोडफोड केली आहे. अपघातात वारकरी ठार झाल्याने सर्वत्र हळहळ व्यक्त केली जात आहे. या अपघातामध्ये बिजलाबाई शिरोळे (रा. वाळकी ता. राहता), राजेंद्र कारभारी सरोरे (रा. माळी ता. कोपरगाव),भाऊसाहेब दशरथ गायकवाड, ओंकार नवनाथ चव्हाण (रा. मढी सूर्य, ता. कोपरगाव), निवृत्ती पुंजा डोगरे (रा. पंचाळा, ता. सिन्नर), शरद सचिन चापके (रा. परभणी),अंकुश ज्ञानेश्वर कराळ (रा. अकोला),मिराबाई मारुती ढमाले (रा. वावी ता. सिन्नर) हे जखमी झाले आहे.
