नाशिक (इंडिया दर्पण वृत्तसेवा) – शहरात मोटारसायकल चोरीची मालिका सुरू असून, वेगवेगळया भागातून नुकत्याच तीन मोटारसायकली चोरट्यांनी पळवून नेल्या. याबाबत म्हसरूळ, आडगाव व अंबड पोलिस ठाण्यात गुह्याची नोंद करण्यात आली आहे.
पेठरोडवरील मेहरधाम भागात राहणारे अनिकेत विष्णू धुम (रा.राजमान्य सोसा.यशोधानगर) यांची एमएच १५ जीडी ४२९१ दुचाकी गेल्या सोमवारी (दि.२७) रात्री त्यांच्या सोसायटीच्या आवारात पार्क केलेली असतांना ती चोरट्यांनी पळवून नेली. याबाबत म्हसरूळ पोलिस ठाण्यात गुह्याची नोंद करण्यात आली असून अधिक तपास हवालदार ढुमसे करीत आहेत.
दुसरी घटना महामार्गावरील अमृतधाम भागात घडली. आकाश पोपट राजोळे (रा.महालक्ष्मी टॉवर वृदावननगर,जत्रा लिंकरोड) यांनी याप्रकरणी तक्रार दाखल केली आहे. राजोळे गुरूवारी (दि.३०) दुपारच्या सुमारास के.के.वाघ महाविद्यालय परिसरात आला होता. अमृतधाम बसस्टॉप परिसरात लावलेली त्याची अ‍ॅक्टीव्हा एमएच १५ जेई ४९०५ चोरट्यांनी चोरून नेली. याप्रकरणी आडगाव पोलिस ठाण्यात गुह्याची नोंद करण्यात आली असून अधिक तपास हवालदार राजूळे करीत आहेत.
तिसरी घटना सिडकोतील उत्तमनगर भागात घडली. मिलींद धर्मादास गजभिये (रा.शालिनीताई बोरसे शाळेजवळ,उत्तमनगर) यांनी तक्रार दाखल केली आहे. गजभिये यांची एमएच १५ जीके २६९४ मोटारसायकल गेल्या २३ नोव्हेंबर रोजी रात्री त्यांच्या घर परिसरात पार्क केलेली असतांना चोरट्यांनी ती पळवून नेली.याबाबत अंबड पोलिस ठाण्यात गुन्हा दाखल करण्यात आला असून अधिक तपास हवालदार राऊत करीत आहेत.
