जळगाव (इंडिया दर्पण वृत्तसेवा)- पारोळा तालुक्यातील बोळे गावाचे काही लोक नातेवाइकाच्या अंत्यसंस्कारासाठी पिकअप गाडीमधून शिंदखेड्याला जात असताना कंटेनरची धडक बसली. त्यात तीन महिला ठार झाल्या, तर २२ जण जखमी झाले.
वाहनातील सर्वजण अंत्ययात्रेसाठी जात असल्याने गाडीतील सर्व शोकमग्न होते. या पिकअपला पारोळ्याकडून धुळ्याकडे जाणाऱ्या एका कंटेनरची जोराची धडक बसली. हा कंटेनर आणखी एका पिकअपला जाऊन धडकला. या घटनेत तीन महिलांचा मृत्यू झाला, तर २२ जण गंभीररित्या जखमी झाले. रेखाबाई गणेश कोळी (वय ५५), योगिता रवींद्र पाटील (वय ४०) यांचा जागीच मृत्यू झाला. चंदनबाई नाना गिरासे (वय ५०) या महिलेला उपचारासाठी रुग्णालयात नेत असताना वाटेत त्यांचा मृत्यू झाला.
कंटेनरवरील (क्रमांक जीजे -१२-बीडबल्यू -७२५४) चालकाचा ताबा सुटल्याने त्याची पिकअपला धडक बसली. अंत्ययात्रेसाठी जाणाऱ्या वाहनातील तीन महिलांचा त्यात बळी गेला. अंत्यसंस्काराठी जाणाऱ्यांवर अंत्यसंस्कार करण्याची वेळ आली. या घटनेमुळे पारोळा येथील कुटीर रुग्णालयात मोठी गर्दी झाली होती.
