इंडिया दर्पण ऑनलाईन डेस्क
मुंबई – राज्यातील वैद्यकीय महाविद्यालये व त्यांच्यांशी संलग्न रुग्णालयांचे आधुनिकीकरण करण्यासाठी आशियाई विकास बँकेने ५०० दशलक्ष अमेरिकन डॉलर्स (सुमारे ४१०० कोटी रुपये) इतके वित्तीय सहाय्य करण्यास सहमती दर्शविली आहे.
उपमुख्यमंत्री देवेंद्र फडणवीस यांनी यासंदर्भात आशियाई विकास बँकेसोबत बैठक घेतली आणि या प्रस्तावाला गती दिली. केंद्र सरकारकडेसुद्धा त्यांनी सातत्याने यासाठी पाठपुरावा केला होता. फडणवीस यांनी पंतप्रधान नरेंद्र मोदी आणि अर्थमंत्री निर्मला सीतारामन यांचे आभार मानले आहेत. २०३० पर्यंत राज्यात परवडणाऱ्या दरात वैद्यकीय सेवा उपलब्ध व्हाव्यात आणि वैद्यकीय क्षेत्रात गुणवत्तापूर्ण सेवा देणारे मनुष्यबळ उपलब्ध व्हावे, हा या प्रकल्पाचा मुख्य हेतू आहे. राज्यातील वैद्यकीय महाविद्यालयांमध्ये गुणात्मक बदल आणि तज्ज्ञ डॉक्टरांच्या सेवा यातून मिळणार आहेत.
वैद्यकीय शिक्षणाच्या कक्षा रुंदावणे आणि अविकसित भागात अत्याधुनिक वैद्यकीय सेवा उपलब्ध करून देण्यात येणार आहेत. वैद्यकीय शिक्षण आणि औषध विभागात जेंडर युनिट कार्यरत करण्यासाठी आशियाई विकास बँकेमार्फत सहाय्य केले जाणार आहे. यातून वैद्यकीय क्षेत्रात पायाभूत सुविधा उपलब्ध होणार आहेत, असे फडणवीस यांनी सांगितले.
