कोलकाता (इंडिया दर्पण वृत्तसेवा)- रिलायन्स इंडस्ट्रीजचे अध्यक्ष मुकेश अंबानी यांनी पश्चिम बंगालमध्ये २० हजार कोटी रुपयांच्या गुंतवणुकीची घोषणा केली आहे. ही गुंतवणूक पुढील तीन वर्षांत केली जाणार आहे. कोलकाता येथे सुरू असलेल्या ७ व्या बंगाल ग्लोबल बिझनेस समिटमध्ये मुकेश अंबानी म्हणाले की, “रिलायन्स बंगालच्या विकासात कोणतीही कसर सोडणार नाही. रिलायन्सने बंगालमध्ये आतापर्यंत सुमारे ४५ हजार कोटी रुपयांची गुंतवणूक केली आहे. आम्ही पुढील तीन वर्षांत २० हजार कोटी रुपयांची अतिरिक्त गुंतवणूक करणार आहोत.
२० हजार कोटी रुपयांची ही गुंतवणूक टेलिकॉम, रिटेल आणि बायो एनर्जी क्षेत्रात केली जाणार आहे. अंबानी म्हणाले की आम्ही 5G राज्याच्या प्रत्येक कानाकोपऱ्यात नेत आहोत, विशेषत: ग्रामीण बंगालला जोडले जात आहे. आम्ही बंगालचा बहुतांश भाग व्यापला आहे. जिओ च्या नेटवर्कमध्ये राज्यातील 98.8% लोकसंख्या आणि कोलकाता टेलिकॉम सर्कलमधील 100% लोकसंख्या समाविष्ट आहे. जिओचे मजबूत नेटवर्क पश्चिम बंगालमध्ये मोठ्या प्रमाणावर रोजगारासह शिक्षण, आरोग्यसेवा आणि शेतीला चालना देईल.
रिलायन्स रिटेल येत्या दोन वर्षांत पश्चिम बंगालमध्ये सुमारे 200 नवीन स्टोअर्स उघडण्याची योजना आखत आहे. बंगालमध्ये सध्या सुमारे 1000 रिलायन्स स्टोअर्स कार्यरत आहेत ज्यांची संख्या वाढून 1200 होतील. मुकेश अंबानी म्हणाले की, शेकडो छोटे आणि मध्यम व्यापारी आणि बंगालचे सुमारे 5.5 लाख किराणा दुकानदार आमच्या रीटेल व्यवसायाशी संबंधित आहेत. त्यांना नवीन स्टोअर्स सुरू झाल्याचा फायदा होईल. प्रभुजी, मुखरोचक, सिटी गोल्ड, बिस्क फार्म यांसारख्या बंगालच्या अनेक प्रादेशिक ब्रँड्सचा संदर्भ देत ते म्हणाले की, रिलायन्स रिटेलच्या माध्यमातून आम्ही हे ब्रँड संपूर्ण देशात घेऊन जात आहोत.
रिलायन्स, भारतातील सर्वात मोठी बायोएनर्जी उत्पादक पुढील तीन वर्षांत 100 कॉम्प्रेस्ड बायोगॅस प्लान्ट्स उभारणार आहे. या प्लांट्समधून 5.5 दशलक्ष टन कृषी अवशेष आणि सेंद्रिय कचरा वापरतील. यामुळे कार्बन उत्सर्जन सुमारे 2 दशलक्ष टनांनी कमी होण्यास मदत होईल आणि वार्षिक 2.5 दशलक्ष टन सेंद्रिय खत तयार होईल. मुकेश अंबानी म्हणाले की, आम्ही शेतकर्‍यांना मोठ्या प्रमाणावर ऊर्जा लागवड करण्यासाठी मदत करू. यामुळे ते अन्नदात्यांसोबत ऊर्जा पुरवठादार बनू शकतील आणि त्यांचे उत्पन्नही वाढेल.
मुकेश अंबानी यांनी आपल्या भाषणात रिलायन्स फाऊंडेशन पं. बंगालमध्ये सुरू असलेल्या कामाचाही उल्लेख केला. कोलकात्यातील प्रसिद्ध कालीघाट मंदिराचे जीर्णोद्धार आणि पुनरुज्जीवन हे यातील सर्वात महत्त्वाचे आहे. या शतकानुशतके जुन्या मंदिराच्या दुरुस्ती आणि सुशोभीकरणाचे काम रिलायन्स फाऊंडेशन करत आहे. फाउंडेशनच्या ‘स्वदेश’ उपक्रमांतर्गत, भारतातील समृद्ध आणि वैविध्यपूर्ण पारंपारिक कला आणि हस्तकलेचा भारतात आणि जागतिक स्तरावर प्रचार केला जात आहे. बंगालमधील कारागिरांच्या तरुण पिढीसाठी रिलायन्स फाऊंडेशन राज्य सरकारच्या सहकार्याने प्रशिक्षण संस्था तयार करणार आहे. तसेच, रिलायन्सच्या रिटेल चॅनेलवर विणकर, कारागीर आणि हस्तकलाकारांची उत्पादने विकण्यासाठी फाउंडेशनसाठी ‘बिस्वा बांगला कॉर्पोरेशन’ सोबत करार करण्यात आला आहे.
