इंडिया दर्पण ऑनलाईन डेस्क
नवी दिल्ली- उत्तरकाशीतील सिल्क्यारा बोगद्यात अडकलेल्या ४१ कामगारांपर्यंत एंडोस्कोपिक फ्लेक्सी कॅमेरा पोहचला आहे. त्यामुळे सर्व कामगार सुरक्षित असल्याचे आनंदी वार्ता मिळाली आहे. याचा व्हिडिओ सुध्दा आता समोर आला आहे.
गेल्या दहा दिवसापासून या कामगारांना वाचवण्यासाठी बचावकार्य जोरात सुरू आहे. प्रत्येक कामगारांचा जीव अमूल्य असून, सर्वांना वाचवण्यासाठी सरकार कटिबद्ध असल्याचे केंद्र सरकारने काल सांगितले होते. यासाठी सरकार आतमध्‍ये अडकलेल्या कामगारांबरोबर सतत संवाद साधत आहे. साधारण दोन किलोमीटर बांधलेल्या बोगद्याच्या मध्ये अडकलेल्या कामगारांचे मनोधैर्य टिकवून ठेवण्यासाठी सर्वतोपरी प्रयत्न केला जात आहे. बोगद्याचा हा २ किमीचा भाग पूर्ण झाला असून त्याचे सिमेंटीकरणही झाले आहे, त्यामुळे कामगारांना सुरक्षितता देणे शक्य झाले आहे.
बोगद्याच्या या भागात वीज आणि पाणी उपलब्ध आहे आणि कामगारांना अन्नपदार्थ त्याचबरोबर औषधे इत्यादींचा पुरवठा करण्‍यासाठी चार इंची ‘कंप्रेसर- पाइपलाइन’चा वापर केला जात आहे. आज, ‘एनएचआयडीसीएल’च्‍या वतीने अन्न,औषधे आणि इतर जीवनावश्यक वस्तूंच्या पुरवठ्यासाठी आणखी ६ इंच व्यासाच्या वाहिनी जाईल इतके मोठे खोदकाम पूर्ण केले. यामुळे मदतकार्यामध्‍ये एक मोठे यश प्राप्त झाले आहे. आणखीही अत्यावश्यक वस्तूंच्या पुरवठा करण्‍यासाठी आरव्‍हीएनएलच्यावतीने दुसर्‍या एका उभ्या पाइपलाइनवर काम सुरू केले आहे.
बोगद्यामध्‍ये अडकलेल्या कामगारांच्या बचाव कार्यामध्‍ये विविध सरकारी संस्था सहभागी झाल्या आहेत. त्यांच्यावर विशिष्ट कार्याची जबाबदारी सोपवण्यात आली आहे. या सर्व संस्था कामगारांना सुरक्षित बाहेर काढण्यासाठी अथक प्रयत्न करत आहेत. त्यात आता ४१ कामगारांपर्यंत एंडोस्कोपिक फ्लेक्सी कॅमेरा पोहचला आहे. त्यामुळे सर्व कामगार सुरक्षित असल्याचे आनंदी वार्ता मिळाली आहे. बघा हा व्हिडिओ
