पुणे (इंडिया दर्पण वृतसेवा) – नवीन आर्थिक वर्षातील आयकर (प्राप्तिकर) रिटर्न फॉर्ममध्ये बदल होणार आहे. केंद्रीय अर्थसंकल्प सादर झाल्यानंतर तसे स्पष्ट झाले आहे. क्रिप्टोकरन्सीमधून मिळाले नफा आणि कर भरण्यासाठी नव्या आयकर रिटर्न फॉर्ममध्ये एक स्वतंत्र कॉलम असेल. या कॉलममध्ये क्रिप्टो करन्सीमधून कमाईची माहिती द्यावी लागेल.
केंद्रीय महसूल सचिव तरुण बजाज म्हणाले की, क्रिप्टोकरन्सीमधून मिळणारा नफा हा नेहमीच करपात्र असतो. अर्थसंकल्पात जे काही प्रस्तावित केले गेले आहे ते नवीन कर नसून या मुद्द्यावर निश्चितता आहे. आम्ही करात निश्चितता आणत आहोत. २०२२-२३ या आर्थिक वर्षाच्या अर्थसंकल्पात क्रिप्टोकरन्सी आणि इतर डिजिटल मालमत्तांच्या व्यवहारांवरील उत्पन्नावर ३० टक्के कर लावण्यात आला आहे. यासोबतच मर्यादेपेक्षा जास्त व्यवहारांवर एक टक्का टीडीएस लावण्याचाही प्रस्ताव आहे. टीडीएसशी संबंधित तरतुदी १ जुलै २०२२ पासून लागू होतील, तर क्रिप्टोवरील कर दि. १ एप्रिलपासून लागू केला जाईल.
केंद्रीय प्रत्यक्ष कर मंडळाचे (सीबीडीटी) अध्यक्ष जे. बी. महापात्रा यांनी क्रिप्टोकरन्सीच्या कायदेशीरतेवर मोठे विधान केले आहे. महापात्रा म्हणाले की, क्रिप्टोकरन्सी किंवा डिजिटल मालमत्तेमध्ये व्यापार करणे कायदेशीर ठरत नाही, जोपर्यंत तुम्ही त्यावर कर भरला आहे का हे ठरत नाही. महापात्रा यांच्या म्हणण्यानुसार, क्रिप्टोकरन्सीसाठी राष्ट्रीय स्तरावर धोरण तयार करण्याचे काम सुरू आहे. तसेच गुंतवणूक चुकीच्या मार्गाने केली गेली आहे की बेकायदेशीर आहे हे कळण्यासही करप्रणाली आम्हाला मदत करेल. जर कोणी बेहिशेबी उत्पन्न ठेवले असेल किंवा ती त्याची ‘बेनामी’ मालमत्ता असेल, तर ती जप्त करून त्यानंतर पुढील कारवाई केली जाईल.
