नागपूर (इंडिया दर्पण वृत्तसेवा) – राज्याच्या राजकारणात सध्या घडामोडी आणि विविध हालचालींना खुपच वेग आला आहे. तीन दिवसांच्या रजेवर असलेले मुख्यमंत्री एकनाथ शिंदे हे सध्या सातारा तालुक्यातील मूळगावी आहेत. मात्र, आता ते अचानक नागपूरकडे जाणार आहेत. केंद्रीय गृहमंत्री अमित शाह हे आज सायंकाळी नागपुरात दाखल होणार आहेत. शाह यांचे स्वागत करण्यासाठी मुख्यमंत्री शिंदे नागपूरला जाणार आहेत. यावेळी उपमुख्यमंत्री देवेंद्र फडणवीस हे सुद्धा उपस्थित राहणार आहेत.
शहरातील जामठा येथे राष्ट्रीय कॅन्सर इन्स्टिट्यूट (एनसीआय) साकारण्यात आले आहे. त्याचे लोकार्पण मंत्री अमित शाह यांच्या हस्ते होणार आहे. हा समारंभ गुरुवार, २७ एप्रिल रोजी सकाळी १०.३० वाजता होणार आहे. या सोहळ्याला राष्ट्रीय स्वयंसेवक संघाचे सरसंघचालक मोहन भागवत, मुख्यमंत्री एकनाथ शिंदे, उपमुख्यमंत्री देवेंद्र फडणवीस, केंद्रीय भूपृष्ठ वाहतूक मंत्री नितीन गडकरी हे सुद्धा उपस्थित राहणार आहेत.
डॉ. आबाजी थत्ते सेवा आणि अनुसंधान केंद्राद्वारे एनसीआय साकारण्यात आले आहे. याद्वारे कॅन्सरच्या रुग्णांवर उपचार केले जाणार आहेत. राज्यासह परराज्यातील अनेक रुग्ण येथे उपचार घेऊ शकणार आहेत. या सोहळ्यासाठी गृहमंत्री अमित शाह हे आज सायंकाळीच नागपुरात दाखल होणार आहेत. त्यासाठी सर्व तयारी करण्यात आली आहे.
अमित शाह हे नागपूर दौऱ्यावर येणार असल्याने त्यांच्या स्वागतासाठी मुख्यमंत्री शिंदे हे उपस्थित राहणार आहेत. विशेष म्हणजे, शिंदे सध्या ३ दिवसाच्या रजेवर सातारा जिल्ह्यातील आपल्या मूळगावी गेले आहेत. आता शाह नागपूरला येणार असल्याने ते नागपूरला जाणार आहेत. यावेळी उपमुख्यमंत्री फडणवीस हे सुद्धा उपस्थित राहणार आहेत.
यावेळी गृहमंत्री शाह, मुख्यमंत्री शिंदे, उपमुख्यमंत्री फडणवीस यांच्यात विविध विषयांवर चर्चा होणार असल्याचे सांगितले जाते. राज्यात मुख्यमंत्री बदलाची जोरदार चर्चा आहे. अशातच आता हे तिन्ही नेते भेटणार असल्याने त्यात काही रणनिती ठरणार का, याकडे सगळ्यांचे लक्ष लागले आहे.
HM Amit Shah Nagpur Visit Cm Shinde DYCM Fadnavis
