इंडिया दर्पण ऑनलाईन डेस्क – सोशल मीडियावर एक व्हिडिओ व्हायरल झाला आहे ज्यामध्ये उच्च न्यायालयाचे न्यायाधीश ड्रेस कोडसाठी वरिष्ठ आयएएस अधिकाऱ्याला फटकारताना दिसत आहेत. ते असे कपडे घालून सिनेमागृहात आहेत का, असे विचारताना न्यायाधीश ऐकू येतात. हा व्हिडिओ पटना उच्च न्यायालयाचा असल्याचे सांगण्यात येत आहे.
वास्तविक, एनडीटीव्हीने या व्हायरल व्हिडिओचा हवाला देत आपल्या एका रिपोर्टमध्ये सांगितले आहे की, हे प्रकरण न्यायाधीश पीबी बजंथारी यांच्या न्यायालयाचे आहे. हा सर्व प्रकार न्यायालयात वादविवाद सुरू असतानाच घडला आणि त्याचवेळी वरिष्ठ आयएएस अधिकारी आनंद किशोर बोलायला उभे राहिले. दरम्यान, न्यायाधीश पीबी बजंथरी यांनी त्याला थांबवले आणि त्यांच्या ड्रेस कोडवर प्रश्न उपस्थित केला.
न्यायमूर्तींनी त्यांना विचारले की, तुम्हाला कोणत्या ड्रेसमध्ये कोर्टात हजर राहायचे आहे हे माहित नाही, किमान कोट आणि कॉलर तरी उघडी नसावी. एवढेच नाही तर, तुम्ही मसुरी येथील सिव्हिल सर्व्हिसेस ट्रेनिंग इन्स्टिट्यूटमध्ये सहभाग नाही घेतला का, तुम्हाला सिनेमा हॉल वाटतो का, असे म्हणत त्यांनी आयएएस अधिकाऱ्याला चांगलेच खडसावले.
न्यायमूर्तींनी इतकं बोलताच शांतता पसरली. न्यायाधीशांच्या प्रश्नावर आयएएस अधिकारी आनंद किशोर स्पष्टीकरण देताना दिसले, परंतु न्यायाधीशांनी त्यांचे ऐकले नाही, ते फक्त न्यायाधीशांचे म्हणणे ऐकत होते. यावेळी आयएएस अधिकाऱ्याच्या आजूबाजूला वकीलही उपस्थित होते. आयएएस आनंद किशोर हे बिहारच्या मुख्यमंत्र्यांच्या जवळचे मानले जातात.
