खा.गोडसे, आ.खोसकर, जि.प.सदस्या माळेकर यांच्या प्रयत्नांना यश
नाशिक – हरसुल आणि परिसरातील गावांमधील सततच्या पाणीटंचाईवर मात करण्यासाठी खा.हेमंत गोडसे, आ.हिरामण खोसकर आणि जिल्हा परिषदेच्या सदस्या रूपांजली माळेकर यांच्या पाठपुराव्याला आता यश आले आहे. नुकतीच शासनाने जलजीवन मिशन या योजनेअंतर्गत राज्यातील साठ पाणी पुरवठा योजनांना मंजूरी दिली असून यामध्ये हरसुल गटातील चिंचवडसह सहा गावांचा समावेश आहे. चिंचवड व सहा गावे पाणी पुरवठा योजनेसाठी तेरा कोटी रूपयांच्या निधीला मान्यता दिली आहे. येत्या काही महिन्यात पाणी पुरवठा योजनेच्या प्रत्यक्ष कामाला प्रारंभ होणार असल्याची माहिती जि.प. सदस्या रूपांजली माळेकर यांनी दिली आहे. आदिवासी भागातील पाणी पुरवठा योजनेसाठी शासनाने तब्बल तेरा कोटी रूपयांचा निधी मंजूर केल्याने आदिवासी बांधवांमध्ये समाधानाचे वातावरण निर्माण झाले आहे.
गेल्या अनेक वर्षापासून हरसुल आणि परिसरातील गावांमधील नागरिकांना सततच्या पाणीटंचाईला सामोरे जावे लागत आहे. पाणी टंचाई विषयीच्या अनेक तकारी हरसुल आणि पंचकोषितील नागरिकांकडून खा.हेमंत गोडसे यांच्याकडे आल्या होत्या. नागरिकांकडून आलेल्या तकारींची दखल घेत गोडसे यांनी या समस्येविषयी आ.हिरामण खोसकर आणि जि.प. सदस्या रूपांजली माळेकर यांच्याशी चर्चा करत शासनाकडे पाणीपुरवठा योजना मंजूरीसाठीचे प्रयत्न सुरू केले होते. खा.गोडसे , आ . खोसकर आणि जि.प. सदस्या रूपांजली माळेकर यांच्या सततच्या प्रयत्नांना आता यश आले आहे. नुकतीच शासनाने जलजीवन मिशन या योजनेअंतर्गत हरसुल गटातील चिंचवडसह सहा गाव प्रादेशिक पाणी पुरवठा योजना मंजूर केली असून याकामी तेरा कोटी रूपयांच्या निधीला मान्यता दिली आहे . पाणी पुरवठा योजना मंजूर झालेल्या गावांमध्ये चिंचवड , जातेगाव खु ।। , जातेगाव बु ।। , सारस्ते , चिरापाली , सापतपाली , महादेवनगर या गावांचा समावेश आहे या योजनेच्या कामांना येत्या काही दिवसांत प्रशासकिय मान्यता मिळणार असून या कामांना लवकरच प्रत्यक्ष प्रारंभ होणार असल्याची माहिती खा हेमंत गोडसे यांनी दिली आहे.
गेल्या चार वर्षाच्या प्रयत्नातून चिंचवडसह सहा गावे प्रादेशिक पाणी पुरवठा योजना मंजुर झाली आहे . यामुळे ही सात गावे लवकरच पाणीटंचाईमुक्त होणार आहे . योजना मान्यतेच्या कामासाठी खा . हेमंत गोडसे , आ.हिरामण खोसकर यांचे मार्गदर्शन आणि सततचा पाठपुरावा कामी आल्याची प्रतिक्रिया जि.प. सदस्या रूपांजली माळेकर यांनी दिली आहे .
