सिद्धी दाभाडे, इंडिया दर्पण वृत्तसेवा
बॉलिवूडचे महानायक अमिताभ बच्चन पुन्हा एकदा आजोबा झाले आहेत. होय, त्यांच्या कुटुंबात एका गोंडस बाळाचा जन्म झाला आहे. तुम्हाला असे वाटेल की ऐश्वर्या राय-बच्चनला आणखी एक अपत्य झाले आहे की काय. पण, तसे नाही. अमिताभ बच्चन यांच्या जावयाने ही गोड बातमी शेअर केली आहे. अमिताभ यांचा धाकटा भाऊ अजिताभ बच्चन यांची मुलगी नयना बच्चन हिने एखा गोंडस बाळाला जन्म दिला आहे.
अमिताभ बच्चन यांची भाची नयना नेहमीच मीडियाच्या लाइमलाइटपासून दूर राहिली आहे. नयना आणि कुणाल कपूर यांचा ९ फेब्रुवारी २०१५ मध्ये विवाह झाला. सेशेल्स बेटावर या दोघांनी सातफेरे घेतले. कुणाल हे रंग दे बसंती स्टार आहेत. नयना आणि कुणाल यांच्याकडे गुडन्यूज आहे हे कुणालाही ठाऊक नव्हतं. लग्नाच्या सात वर्षांनंतर दोघांनाही आई-वडिल झाल्याचा आनंद मिळाला. कुणाल कपूर आणि नयना बच्चन यांची भेट थिएटरच्या दिवसांमध्ये झाली होती आणि त्यातूनच दोघांची प्रेमकहाणी सुरू झाली.
कुणालनं सोशल मीडिया पोस्ट करत ही आनंदाची बातमी सर्वांपर्यंत आणली. ‘आमच्या सर्व हितचिंतकांसाठी… नयना आणि मला हे सांगण्यात अतिशय आनंद होतोय की, आम्ही एका मुलाचे पालक झालो आहोत. या आशिर्वादासाठी आम्ही परमेश्वराचे ऋणी आहोत’, असं कुणालनं त्याच्या पोस्टमध्ये लिहिलं आहे. ही गोड बातमी बाहेर पडताच कुणाल आणि नयना वर अभिनंदांचा वर्षाव होऊ लागला आहे.
अभिनेता हृतिक रोशन, अंगद बेदी, अक्षय ओबेरॉय आणि इतरांनी या जोडप्याचे अभिनंदन केले आहे. कुणालचा जवळचा मित्र असलेल्या हृतिकने पहिल्यांदाच अनेक हृदय इमोजी टाकून कुणाल आणि नयनाला शुभेच्छा दिल्या. हृतिकची माजी पत्नी सुझान खानची कुणालसोबत चांगली मैत्री आहे. तिने लिहिले आहे की, “सर्वात मोठे अभिनंदन कुणाल.. तू अतिशय चांगला पालक बनणार आहेस.” दरम्यान, नयनाची चुलत बहीण श्वेता बच्चन हिने कमेंट केली, “तुम्हा सर्वांवर प्रेम आहे.”
