नवी दिल्ली – सणासुदीच्या दिवसांमध्ये कर्मचारी भविष्य निर्वाह निधी संघटना (ईपीएफओ) आपल्या सहा कोटी सदस्यांना आनंदाची बातमी देणार आहे. ईपीएफओकडून दिवाळीपूर्वी २०२०-२१ या आर्थिक वर्षाचे व्याज सदस्यांच्या खात्यात जमा करण्याच्या तयारीत आहे, अशी माहिती दोन वरिष्ठ अधिका-.यांनी दिली आहे.एक अधिकारी म्हणाले, केंद्रीय कर्मचा-यांना आणि निवृत्तिवेतनधारकांना महागाई भत्ता मिळणार आहे. ईपीएओच्या केंद्रीय मंडळाने व्याजात वाढ करण्याची मंजुरी दिली आहे. निवृत्तीवेतन व्यवस्थापनाने अर्थ मंत्रालयाकडे मंजुरी मागितली आहे. लवकरच त्याला मंजुरी मिळण्याची शक्यता आहे. अर्थ मंत्रालयाकडून मंजुरी मिळणे हा प्रोटोकॉल आहे. त्यांच्या मान्यतेशिवाय व्याजदराची रक्कम ईपीएफओ खात्यात क्रेडिट करू शकत नाही, असा काही लोकांचा तर्क आहे. दुसरे अधिकारी म्हणाले, मागील दीड वर्ष पगारदार कर्मचारी आणि मजूर, कामगांरांना खूपच कठिण गेले. ईपीएफओच्या अपेक्षित निधीमुळे त्यांचा मूड चांगला होण्यास मदत होईल. ईपीएफओ मंडळाने २०२१ या आर्थिक वर्षासाठी ८.५ टक्के व्याजानुसार पैसे देण्याची शिफारस केली होती.
सात वर्षात सर्वात कमी व्याजदर
गेल्या आर्थिक वर्षात ईपीएफओने जवळपास ७० हजार ३०० कोटी रुपयांच्या मिळकतीचा अंदाज लावला आहे. त्यामध्ये त्यांच्या शेअरच्या एका भागाची विक्री केल्यास ४ हजार कोटी रुपयांच्या मिळकतीचा समावेश आहे. २०२० मध्ये कोविड-१९ प्रादुर्भावामुळे ईपीएफओने मार्च २०२० मध्ये पीएफ व्याजदर घटवून ८.५ टक्के इतके केले होते. गेल्या सात वर्षांमधील हा सर्वात कमी व्याजदर आहे.
खासगी कंपन्यांकडूनही तयारी
केंद्र आणि राज्य सरकारतर्फे कर्मचारी आणि निवृत्तिवेतनधारकांना महागाई भत्ता दिल्यानंतर खासगी कंपन्यासुद्धा दिवाळीत कर्मचा-यांना मोठा बोनस देण्याची तयारी करत आहेत. गेले दोन वर्ष कंपनी आणि कर्मचा-यांसाठी खूपच कठीण होते. यावर्षी परिस्थितीत सुधारणा झाल्याने आम्ही कर्मचा-यांना बोनस देण्याचे नियोजन करत आहोत. सर्वकाही सुरळीत चालल्यास कर्मचा-यांना आनंद देण्याचा क्षण निश्चित येणार आहे, असे अनेक कंपन्यांच्या प्रतिनिधींनी सांगितले.
