इंडिया दर्पण ऑनलाईन डेस्क – गेल्या तीन वर्षांच्या तुलनेत यंदा (नोव्हेंबर महिन्यापर्यंत) सर्वाधिक सोन्याची जप्ती झाली. या वर्षी नोव्हेंबरपर्यंत तब्बल 3,083 किलो सोने जप्त करण्यात आल्याची माहिती सोमवारी संसदेत देण्यात आली. सोन्याच्या तस्करीची सर्वाधिक प्रकरणे केरळमधून समोर आली आहेत. 2021 मध्ये देशभरातून 2,383 किलो आणि 2020 मध्ये 2,154 किलो सोने जप्त करण्यात आले. तर 2019 मध्ये 3,673 किलो सोने जप्त करण्यात आले होते. 2022 मध्ये (नोव्हेंबरपर्यंत) 3,588 प्रकरणांमध्ये 3,083.61 किलो सोने जप्त करण्यात आले आहे.
या राज्यात सर्वाधिक
केरळमध्ये या वर्षी 948 प्रकरणांमध्ये 690 किलो सोने जप्त करण्यात आले आहे. 2021 मध्ये 587 किलो आणि 2020 मध्ये 406 किलो सोने जप्त करण्यात आले आहे. तर 2019 मध्ये 725 किलो सोने जप्त करण्यात आले होते. केरळ व्यतिरिक्त, या वर्षी नोव्हेंबर 2022 पर्यंत महाराष्ट्रात सोन्याच्या तस्करीची 484 प्रकरणे नोंदवली गेली, ज्यामध्ये 474 किलो सोने जप्त करण्यात आले. तामिळनाडूमध्ये 809 प्रकरणे नोंदवली गेली आणि 440 किलो सोने जप्त करण्यात आले. पश्चिम बंगालमध्ये 214 प्रकरणे नोंदवली गेली आणि 369 किलो सोने जप्त करण्यात आले.
अर्थमंत्रीही चिंतेत
अर्थ राज्यमंत्री पंकज चौधरी म्हणाले की, सीमा शुल्क क्षेत्र अधिकारी आणि महसूल गुप्तचर संचालनालय (डीआरआय) सतत लक्ष ठेवतात. गेल्या आठवड्यात, महसूल गुप्तचर संचालनालयाच्या अधिकाऱ्यांना संबोधित करताना, अर्थमंत्री निर्मला सीतारामन म्हणाले की, सीमाशुल्क असूनही सोन्याची तस्करी होत आहे. आयात आणि तस्करी यांच्यात काही नमुना आणि संबंध आहे का, अशी विचारणाही त्यांनी गुप्तचर अधिकाऱ्यांना केली होती.
देशांतर्गत चलनावरील दबाव कमी करण्यासाठी आणि आयात कमी करण्यासाठी जुलैमध्ये सोन्यावरील आयात शुल्क 7.5 टक्क्यांवरून 12.5 टक्के करण्यात आले. 2021-22 मध्ये सोन्याची आयात 33 टक्क्यांनी वाढून $46.14 अब्ज झाली आहे. चीननंतर भारत हा जगातील दुसऱ्या क्रमांकाचा सोन्याचा ग्राहक आहे. वित्त राज्यमंत्री चौधरी पुढे म्हणाले की, गेल्या तीन वर्षांत राष्ट्रीय तपास संस्थेने (एनआयए) सोन्याच्या तस्करीच्या तीन प्रकरणांचा तपास करून आरोपपत्र दाखल केले आहेत.
Gold Seized Smuggling Crime Government Record
