इंडिया दर्पण ऑनलाईन डेस्क – मागच्या सीटवरची व्यक्ति बसण्यापूर्वीच दुचाकी पुढे निघून गेल्याच्या घटना आपल्या आयुष्यात दररोज घडतात. त्या गमतीदार असतात. पण एखादे विमान प्रवासी बसण्यापूर्वीच उडून गेल्याची घटना घडू शकते, असा तुम्ही स्वप्नात तरी विचार करू शकता का? याचे उत्तर नाही असेल, पण असे प्रत्यक्ष करून दाखविण्याची किमय केली आहे गो एअर कंपनीच्या विमानाने. ये इंडिया है भाई… यहाँ कुछ भी हो सकता है।
वेळ आणि शिस्त पाळणं हे कुठल्याही विमान कंपनीचं पहिलं कर्तव्य मानलं जातं. म्हणजे तुम्ही पाच मिनिटे उशिरा आलात म्हणून गावातली बस थांबू शकते, विमान तुमच्यासाठी थांबत नाही. अश्यावेळी बंगळुरू येथून दिल्लीसाठी जाणारे प्रवासी आपलं विमान उडताना डोळ्याने बघत राहिले आणि ते काहीच करू शकले नाही. बंगळुरू येथून दिल्लीला जाण्यासाठी जवळपास ५५ प्रवाश्यांनी बोर्डींग पास घेतले आणि चेक-इन करून प्रवासासाठी सज्ज झाले. इतर प्रक्रिया झाल्यानंतर सगळे प्रवासी बसने विमानाच्या जवळ पोहोचले. पण सगळे प्रवासी बसमध्येच असताना गो एअरचे हे G8-116 हे विमान आकाशाच्या दिशेने झेपावले. पहिले तर प्रवाश्यांना वाटलं की हे विमान आपलं नाहीच. पण जेव्हा विमानतळावरील इतर कर्मचाऱ्यांचा गोंधळ झाला, तेव्हा त्यांना लक्षात आलं की आपल्या डोळ्यापुढे जे विमान भूर्र उडालं ते आपलंच होतं. नागरी विमान वाहतुक महासंचालनालयानं या घटनेची गंभीर दखल घेत गो-एअरला खडसून सुनावले आहे.
एक प्रवास फ्री
गो-एअरने संबंधित विमानातील सर्व कर्मचाऱ्यांना तातडीने काढून टाकले आहे. पण त्यामुळे प्रवाश्यांचं समाधान थोडेच होणार होतं. त्यामुळे कंपनीने सर्व प्रवाश्यांना वर्षभरात भारतात कुठल्याही शहरात जाण्यासाठी एका मोफत विमान प्रवासाची घोषणा केली आहे.
एअर इंडिया आले धावून
गो-एअरने अफलातून पराक्रम केल्यानंतर या प्रवाश्यांना एअर इंडियाचा पर्याय देण्यात आला. सकाळी साडेसहावाजता दिल्लीच्या दिशेने निघालेले प्रवासी सकाळी १० वाजता म्हणजे जवळपास चार तासांनी एअर इंडियाच्या विमानात बसले आणि पुढे निघाले.
Go Air Flight 50 passengers Take Off Compensation Aviation
Air Service Bengaluru
