इंडिया दर्पण ऑनलाईन डेस्क
सांगली जिल्ह्यातील आटपाडी तालुक्यातील नेलकरंजी गावात बारावीत शिकणा-या आपल्या मुलीला नीट परिक्षेत कमी मार्क पडल्याच्या रागातून मुख्याध्यापक बापाने जात्याच्या लाकडी खुट्यांनं मुलीला बेदम मारहाण केली. या मारहाणीत मुलीचा मृत्यू झाल्याचा धक्कादायक प्रकार घडला. याप्रकरणी वडील धोंडीराम भोसले या मुख्याध्यापकाला अटक करण्यात आली आहे. शुक्रवारी रात्री ९.३० वाजेच्या सुमारास हा प्रकार घडला.
साधना भोसले असे मुलीचे नाव असून ती बारावीमध्ये शिक्षण घेत होती. डॅाक्टर बनण्याचं तिचं स्वप्न होतं. पण, नीट परीक्षेत तीला कमी गुण मिळाल्याने वडिलाचा संताप वाढला. त्यांनी जात्याच्या खुंट्यांनी साधनास बेदम मारहाण केली. या मारहाणीत ती गंभीर जखमी झाली होती. परंतु तिला रुग्णालयात उपचारासाठी न नेता दुस-या दिवशी सकाळी योग दिन साजरा करण्यासाठी ते शाळेतून निघून गेले. शाळेतून परतल्यानंतर साधना बेशुध्द अवस्थेत असल्याचे दिसून आले. नंतर तीला उपचारासााठी रुग्णालयात दाखल करण्यात आले. परंतु तिचा उपचारापूर्वीच मृत्यू झाला. या घटनेनंतर साधनाची आई प्रीती भोसले यांनी पोलिस ठाण्यात फिर्याद दाखल केल्यानंतर रविवारी मुख्याध्यापक वडील धोंडीराम भोसले यांना अटक करण्यात आली.
कमी मार्क पडल्याने साधनाने पप्पा, तुम्ही कुठे कलेक्टर झालात तुम्हालाही कमीच मार्क पडले होते ना असं उलट उत्तर साधनाने दिल्याने संतापलेल्या बापाने अमानुष मारहाण केली. त्यात साधनाचा मृत्यू झाला.
