इंडिया दर्पण ऑनलाईन डेस्क
हनीट्रॅप प्रकरणानंतर काहीही संबंध नसताना केवळ एका फोटोच्या जोरावर प्रफुल्ल लोढासोबत माझे नाव जोडण्यात काही रिकामटेकडे लोक पुढे आहेत. त्यांच्याच पक्षाचे नेते असलेल्या शरद पवार, सुप्रिया सुळे, उध्दव ठाकरे, जयंत पाटील यांच्यासोबत प्रफुल्ल लोढाचे असंख्य फोटो आहेत. आता या लोकांचे प्रफुल्ल लोढा सोबत काय संबंध आहेत? असा प्रश्न करत मंत्री गिरीश महाजन यांनी काही फोटो फेसबुकवर शेअर केले आहे.
या पोस्टमध्ये त्यांनी म्हटले आहे की, त्यांचंच सरकार असताना मला नाहक खोट्या गुन्ह्यांमध्ये अडकवण्याचा प्रयत्न झाला होता. त्यासाठीच सर्वांनी या प्रफुल्ल लोढाला हाताशी धरलं होतं का? खुद्द ‘मोठे साहेब’शरद पवारांसोबत प्रफुल्ल लोढाची गहन चर्चा करत असतांनाच फोटो आहे. तर दुस-या फोटोत
जिथे संजय राऊत उभा राहतो तिथे उद्धव ठाकरे यांच्या अगदी शेजारी उभा असलेला, कोणीही मास्क लावलेला नसताना (ओळख लपवण्यासाठी) एकटाच मास्क लावून असलेला प्रफुल्ल लोढा…तिसरा फोटो सुप्रिया सुळे ताईंसोबत खडसेंचा लाडका लोढा… तर चौथ्या फोटोत शरदचंद्र पवार गटाचे गटाचे तत्कालीन प्रदेशाध्यक्ष / कॅबिनेट मंत्री जयंत पाटील यांच्याशी प्रफुल्ल लोढाची जवळीक असलेला फोटो आहे.
तर दुस-या पोस्टमध्ये गिरीश महाजन यांनी खडसेंबरोबर प्रफुल्ल लोढा यांचा एक फोटो शेअर केला आहे. या फोटोच्या पोस्टमध्ये म्हटले आहे की,
एकनाथ खडसे… तुमच्या या “गुलाबी गप्पा” कोणासोबत रंगल्या आहेत? ये रिश्ता क्या कहलाता है? तुमचे हे षडयंत्र जनतेसमोर उघड होतंय…
हाच तो प्रफुल्ल लोढा ज्याला तुम्ही दारूडा बोलला होतात? हाच तोच प्रफुल्ल लोढा ज्याने तुमच्यावर स्वतःच्या मुलाच्या खुनाचा आरोप केलेला आहे…
२०१९ ते २०२२ च्या दरम्यान अश्या खोट्या पुराव्यांचा आधारे सत्तेचा गैरवापर करून तुम्ही माझ्यावर असंख्य आरोप केले. त्या प्रत्येक आरोपाची चौकशी झाली, अगदी आर्थिक गुन्हे शाखेकडूनही माझी चौकशी झाली, पण त्यातून काहीही निष्पन्न झाले नाही. मी निर्दोष आहे हेच वारंवार सिद्ध झाले.
याबद्दल सविस्तर बोलेलच…आता तुमच्याच म्हणण्यानुसार जो लोढा दारूडा आहे त्याच प्रफुल्ल लोढाचा आधार घेऊन माझ्यावर बिनबुडाचे आरोप करताय ?
एकनाथ खडसे… काय तुझी हि व्यथा…!
