इंडिया दर्पण ऑनलाईन डेस्क
ग्रामविकास मंत्री गिरीश महाजन यांच्या विधानसभा मतदार संघात रस्त्यांची दुरावस्था झाली असल्याचे सांगत विधान परिषदेचे विरोधी पक्षनेते अंबादास दानवे यांनी एक व्हिडिओ सोशल मीडियावर पोस्ट केला आहे. त्यात त्यांनी गिरीश महाजन यांना लाजा वाटू द्या थोडी असे म्हटले आहे.
या व्हिडिओबरोबर केलेल्या पोस्टमध्ये दानवे यांनी म्हटले आहे की, ग्रामविकास मंत्री गिरीश महाजन यांना तरुणांनी विचारला जाब…. जामनेर तालुक्यातील लिहा तांडा येथे भंडाऱ्यानिमित्त गिरीश महाजन आले असता गेल्या ३० वर्षापासून आम्ही तुम्हाला निवडून देत आहोत तरी आमच्या गावातील रस्त्यांची अशी दुरावस्था का ? असे विचारले असता मंत्री महोदयांनी ग्रामस्थांच्या प्रश्नाचे उत्तर न देता तेथून पळ काढला… जामनेर तालुक्यात एकच चर्चा. @girishdmahajan लाजा वाटू द्या थोडी!
या व्हिडिओवर गिरीश महाजन यांची प्रतिक्रिया समोर आली आहे. त्यांनी सांगितले की, परिसरात पाऊस झाल्याने काही ठिकाणी चिखल झाला आहे. आपण दुचाकीवरुन जात असताना काही जणांनी व्हिडिओ काढला असेल. मात्र नागरिकांनी जाब विचारला असे नव्हे. गाव परिसरात असलेल्या समस्या जाणून घेण्यासाठी आपण या गावात सायंकाळच्या सुमारास गेलो होतो असेही त्यांनी सांगितले.
