इंडिया दर्पण ऑनलाईन डेस्क – रिलायन्सचे सर्वेसर्वा मुकेश अंबानी यांच्या घरी मंगलकार्य झाल्यानंतर आता अदानी कुटुंबातही सनई चौघडे वाजले आहेत. अदानी समुहाचे प्रमुख गौतम अदानी यांचा मुलगा जीत अदानी याचा साखरपुडा झाला आहे. गौतम अदानी यांचा धाकटा मुलगा जीत अदानी याने १२ मार्च रोजी एका हिरे व्यापाऱ्याच्या मुलीशी लग्नगाठ बांधण्याचे निश्चित केले आहे. अदानी कुटुंबातील धाकटी सून दिवा शाह ही हिरे व्यापारी जमीन शाह यांची मुलगी आहे. रविवारी अहमदाबादमध्ये जीत आणि दिवा यांचा साखरपुडा संपन्न झाला.
दिवाचे वडील जमिन शाह हे सी दिनेश अँड कंपनी प्रा. लि.चे मालक आहेत. ही कंपनी मुंबई आणि सुरत येथून व्यवसाय करते. त्याची स्थापना चिनू दोशी आणि दिनेश शहा यांनी केली होती. सध्या जिगर दोशी, अमित दोशी, योमेश शहा, जमिन शहा हे कंपनीचे संचालक आहेत. हिंडनबर्गचा अहवाल सार्वजनिक झाल्यानंतर अदानी समूह सतत चर्चेत आहे. दरम्यान, कुटुंबातील धाकट्या मुलाच्या साखरपुड्याची बातमी समोर आली आहे.
जीत अदानी यांनी आपले शालेय शिक्षण पेनसिल्व्हेनिया विद्यापीठाच्या स्कूल ऑफ इंजिनीअरिंग अँड अप्लाइड सायन्सेसमधून केले आहे. ते २०१९ मध्ये अदानी ग्रुपमध्ये सामील झाले आहेत. ते सध्या समूहाच्या वित्त विभागाचे उपाध्यक्ष आहेत. गौतम अदानी यांना दोन मुले आहेत. त्यांचा मोठा मुलगा करण अदानी यांचा विवाह सिरिल श्रॉफ यांची मुलगी परिधी श्रॉफशी झाला आहे.
Gautam Adani Son Jeet Engagement Ceremony
