ठाणे (इंडिया दर्पण वृत्तसेवा) – पालघर जिल्ह्यातून एक अत्यंत दुःखद घटना समोर आली आहे. येथे गरबा खेळणाऱ्या तरुणाचा मृत्यू झाला. मुलाच्या मृत्यूचा धक्का वडिलांना सहन झाला नाही आणि त्यांचाही मृत्यू झाला आहे. एकाचवेळी पिता आणि पुत्र दोघांचे निधन झाल्याने कुटुंबियांवर मोठेच संकट कोसळले आहे. हे प्रकरण पालघर जिल्ह्यातील विरार शहरातील आहे. येथील गरबा कार्यक्रमात नाचताना एका ३५ वर्षीय व्यक्तीचा मृत्यू झाला. पोलिसांनी ही माहिती दिली आहे.
विरारच्या पोलिस अधिकाऱ्याने दिलेल्या माहितीनुसार, शनिवार-रविवारच्या मध्यरात्री विरारमधील ग्लोबल सिटी कॉम्प्लेक्समध्ये गरबा कार्यक्रम सुरू होता. त्यावेळी मनीष नरपाजी सोनिग्रा हा युवक गरबा खेळत होता. त्याचवेळी तो नाचत असताना खाली पडला. या युवकाला त्याचे वडील नरपजी सोनिग्रा यांनी तातडीने रुग्णालयात नेले. डॉक्टरांनी तपासून या युवकाला मृत घोषित केले. आपल्या मुलाच्या मृत्यूची बातमी ऐकून वडीलही कोसळले. त्यांचाही रुग्णालयातच मृत्यू झाला. दोन्ही मृतदेह शवविच्छेदनासाठी पाठवण्यात आले असून या संदर्भात अपघाती मृत्यूची नोंद करण्यात आली आहे.
गुजरातमध्येही घटना
गुजरातच्या आनंद जिल्ह्यातही गरबा खेळत असताना एका २१ वर्षीय तरुणाचा हृदयविकाराच्या झटक्याने मृत्यू झाला. तारापुरा, आनंद येथील शिवशक्ती सोसायटीतर्फे गरबा कार्यक्रमाचे आयोजन करण्यात आले होते. वीरेंद्र सिंग रमेश भाई राजपूत असे मृत युवकाचे नाव आहे. ३० सप्टेंबर रोजी वीरेंद्र हा गरबा खेळत होता. यादरम्यान मित्र त्याचा व्हिडिओ बनवत होते. त्यानंतर अचानक वीरेंद्र बेशुद्ध होऊन खाली पडला.
सोसायटीतील तरुणांनी त्याला घाईघाईत रुग्णालयात नेले. मात्र वाटेतच वीरेंद्रचा मृत्यू झाला. हृदयविकाराच्या झटक्याने तरुणाचा मृत्यू झाल्याचे डॉक्टरांनी सांगितले. व्हिडिओच्या सुरुवातीला वीरेंद्र खूपच अस्वस्थ दिसत आहे. त्यानंतर गरबा खेळताना तो जमिनीवर पडतो. वीरेंद्र राजपूतचे वडील मोरज गावातील प्राथमिक शाळेत मुख्याध्यापक आहेत. वीरेंद्र हा दोन भावांमध्ये लहान होता. मुलाच्या आकस्मिक निधनाने कुटुंबात शोककळा पसरली आहे.
Garba Playing Youth Death after Father Also Dead
