सतत काहीतरी चटपटीत खावंसं वाटतंय? ही असू शकते आजाराची पूर्वसूचना

विशेष प्रतिनिधी, मुंबई

कोणतीही गोष्ट खाण्याची खूप इच्छा होणे, म्हणजे फूड क्रेव्हिंग. हे जसे आवडत्या गोष्टींसाठी, खाद्यपदार्थांसाठी होते, तसे ते आणखी एका गोष्टीसाठी होते. ते म्हणजे, शरीरात काही पोषणतत्त्वांची कमतरता असणे. फूड क्रेव्हिंगमुळे केवळ वजनच वाढत नाही तर यामुळे टाईप – २ चा मधुमेहही होण्याची शक्यता असते. या आजारातून वाचण्यासाठी आम्ही तुम्हाला मदत करू. तुम्हाला ज्या गोष्टी खायला आवडतात, त्याला रिप्लेस करतील असे काही पदार्थ आम्ही सुचवणार आहोत.

 चिप्स

अनेकांना सकाळी किंवा संध्याकाळी उशीरा सॉल्टी चिप्स खाण्याची इच्छा होते. मग अशावेळी चिप्स, सामोसा आणि स्नॅक्स खातात. तुम्हाला जर असे वाटत असेल तर याचा एक अर्थ असा होतो की, संबंधित व्यक्ती तणावाखाली आहे. अशावेळी तेलकट किंवा सॉल्टी स्नॅक्स खाण्यापेक्षा बेक्ड पदार्थ खावेत.

चॉकलेट

चॉकलेट खावंसं वाटणं, म्हणजे हार्माेनलमध्ये काही ना काही बदल होणे. हे लक्षण विशेषत: महिलांमध्ये पिरीयड्सच्या आधी दिसते. याशिवाय मॅग्निशिअमच्या कमतरतेमुळे देखील ही इच्छा होऊ शकते. पण, चॉकलेट खाल्ल्याने कॅलरी वाढू शकतात. याऐवजी मिक्स्ड नट्स खाऊ शकता. यामुळे मॅग्निशिअमची कमतरता भरून निघेल आणि जिभेचे चोचले पुरवले जातील.

पाव आणि पास्ता

अनेकांना सॅण्डविच प्रिय असतं. याशिवाय, बर्गर, पास्ता वगैरेलाही अनेकांची पसंती असते. या गोष्टी तुम्हाला आवडतात म्हणजे तुमच्या शरीरात कर्बोदके अर्थात कार्बाेहायड्रेट्सची कमतरता आहे. हे पदार्थ कितीही आवडत असले तरी ते आठवड्यातून एकदाच खावेत. त्याऐवजी रताळे किंवा ओट्सला प्राधान्य द्यावे. यात भरपूर फायबर आणि कार्बाेहायड्रेट्स असतात.

गोड पदार्थ

अनेकांना जेवल्यानंतर गोड पदार्थ खाण्याची इच्छा किंवा सवय, दोन्ही असते. ही आवड असेल तर ठीक आहे. अन्यथा शरीरात क्रोमिअमची कमतरता असेल, तर असे होऊ शकते. या कमतरतेमुळे तुम्ही जर सातत्याने गोड पदार्थ खात असाल तर मधुमेह होण्याची, असल्यास वाढण्याची भीती आहे. तसेच वजनही वाढू शकते. हे टाळण्यासाठी तुम्ही सफरचंद खाऊ शकता. किंवा ड्राय फ्रुट्स आणि मध एकत्र करून वेगळी डिश तयार करून खाऊ शकता. यातून शरीराची झीज भरून निघेल.