इंडिया दर्पण ऑनलाईन डेस्क – देशात महागाई वाढत असल्याच्या कारणाने विरोधकांकडून सातत्याने सरकारवर टीका केली जाते. परंतु, महागाई वाढण्यामागची तांत्रिक कारणं सर्वसामान्यांपर्यंत पोहोचत नाही. केंद्रीय अर्थमंत्री निर्मला सीतारामन यांनी मात्र अलीकडेच एका पत्रकार परिषदेत देशात महागाई वाढण्याची कारणं सांगितली.
केंद्रीय मंत्री निर्मला सीतारामन कर्नाटकातील कलबुर्गी येथे पत्रकारांशी बोलत होत्या. त्यांनी पत्रकारांच्या विविध प्रश्नांना उत्तरे दिली. पण यात प्रामुख्याने महागाईच्या संदर्भात प्रश्न विचारण्यात आला. निर्मला सीतारामन यांनी देशात महागाई वाढण्यामागे हंगामी समस्या कारणीभूत आहेत, असे म्हटले आहे. ‘हंगामी पातळीवर पुरवठ्यांशी संबंधित समस्यांमुळे महागाई वाढली आहे. जीवनावश्यक वस्तुंची उपलब्धता आणि त्यांच्या किमती यावर सरकार लक्ष ठेवून आहे.
परिस्थितीनुसार आवश्यकता लक्षात घेता अतिरिक्त साठा जारी करण्यात आला. तांदळाचे भाव वाढले तेव्हा आम्ही बफर स्टॉकमधून तांदूळ दिला. तरीही केंद्र सरकार दर कमी करण्यासाठी सातत्याने प्रयत्न सुरू आहेत. त्यामुळे किरकोळ महागाईचा दर आता ६ टक्क्यांच्या खाली आला आहे,’ असे सीतारामन म्हणाल्या. गव्हाचे दर नियंत्रणात ठेवण्यासाठी सरकारनं गहू खरेदीला गती दिली आहे. चालू आर्थिक वर्षात ३.४१ कोटी टन गहू खरेदी करण्याचे उद्दिष्ट्य ठेवण्यात आले आहे.
आतापर्यंत १.७० कोटी टन गव्हाची खरेदी झाली आहे. एका सरकारी अधिकाऱ्याने दिलेल्या माहितीनुसार गव्हाच्या खरेदीला गती देणे आवश्यक आहे. जेणेकरून पुरवठ्यानुसार किरकोळ बाजारात गव्हाचा पुरवठा करता येईल. पुरठ्याबाबत काही गडबड झाल्यास गव्हाच्या दरात वाढ होण्याची शक्यतादेखील निर्मला सीतारामन यांनी व्यक्त केली.
इंधनाचे दर योग्य पातळीवर
पेट्रोल आणि डिझेलच्या वाढत्या दरांच्या बाबतीतही त्यांनी स्पष्ट केले. इंधन आणि नैसर्गिक वायूच्या किंमती कमी करण्याचा प्रयत्न सुरू आहे. इंधन आणि नैसर्गिक वायूची आयात केली जाते. पण कोरोना, रशिया-युक्रेन युद्धामुळे जागतिक बाजारपेठेत इंधनाचे दर सर्वाधिक आहेत. त्यामुळे परिणाम होत आहे, असे सीतारामन म्हणाल्या.
Finance Minister Nirmala Sitharaman on Inflation
