नवी दिल्ली (इंडिया दर्पण वृत्तसेवा) – क्रिप्टोकरन्सीमधील गुंतवणूक करणाऱ्यांसाठी अत्यंत महत्त्वाचे वृत्त आहे. केंद्रीय अर्थमंत्री निर्मला सीतारामन यांनी आज अर्थसंकल्प सादर करताना एक महत्त्वपूर्ण घोषणा केली आहे. त्यानुसार क्रिप्टोकरन्सीद्वारे मिळणारे उत्पन्न आता कराच्या कक्षेत येणार आहे. क्रिप्टोकरन्सीच्या उत्पन्नावर तब्बल ३० टक्के कर लागणार आहे. तसे अर्थमंत्र्यांनी स्पष्ट केले आहे.
क्रिप्टोकरन्सी हा एक डिजिटल चलन (अॅसेट ) असून ते वस्तू किंवा सेवांच्या खरेदीसाठी वापरले जाते. या चलनात क्रिप्टोग्राफी वापरली जाते. आपण ते प्रॉपर्टी म्हणून वापरू शकतो, परंतु यासाठी बँक, एटीएम असे काही नसते. जगातील बऱ्याच देशांमध्ये क्रिप्टोकरन्सी ऑनलाईन शॉपिंगमध्ये वापरली जाते. काही जण आधीच क्रिप्टोकरन्सीजमधून मिळणाऱ्या उत्पन्नावर भांडवली नफा कर भरत आहेत.
क्रिप्टोकरन्सी हे सोने आणि समभागांप्रमाणे ठेवल्या जाऊ शकतात, आता क्रिप्टोकरन्सीचा वापर खरोखरच खूप वाढला आहे. क्रिप्टोकरन्सी ट्रेडिंगमध्ये पैसे गुंतलेल्यांना फॅसिलिटेटर, ब्रोकरेज आणि ट्रेडिंग प्लॅटफॉर्म म्हणून वर्गीकृत केले जाऊन जीएसटी अंतर्गत ३० टक्के कर आकारला जाणार आहे, अलीकडच्या काळात, क्रिप्टोकरन्सीमधील गुंतवणुकीवर सहज आणि उच्च परतावा देण्याचे आश्वासन देणार्‍या, चित्रपटातील सुपरस्टार दाखविणाऱ्या जाहिरातींची संख्या वाढत आहे. क्रिप्टोकरन्सीच्या वापरावर सध्या कोणतेही नियमन किंवा कोणतेही निर्बंध नाहीत.
