नाशिक – अन्न व औषध प्रशासनाने विल्होळीत १ लाख ४३ हजाराचा गुटखा जप्त केला. सोमवारी अन्नसुरक्षा अधिकारी गोपाळ कासार यांना मिळालेल्या गुप्त माहितीच्या आधारे अन्न व औषध प्रशासनाने विल्होळीतील भावनाथ गल्ली येथील शिवाजी रघुनाथ भावनाथ यांच्या राहत्या घरी धाड टाकली. त्यात हा साठा सापडला. यात राज्यात प्रतिबंधित असलेला गुटखा पानमसाला व सुगंधी तंबाखूचे पंधरा प्रकारचा साठा विक्रीसाठी आढळून आला. त्याची किंमत रुपये १ लाख ४३ हजार ८२६ इतकी आहे. हा सर्व साठा विक्रेता व मालक शिवाजी रघुनाथ भावनाथ यांच्याकडून जप्त करण्यात आला आहे. जप्त केलेला साठा हा कोणाच्या मालकीचा असून तसेच याचा मुख्य सूत्रधार निष्पन्न करणे कामी व या प्रकरणी संपूर्ण उत्पादक पर्यंत तपास करण्यासाठी नाशिक तालुका पोलीस स्टेशन येथे दाखल करण्यात आला आहे. सदरची कार्यवाही सह आयुक्त अन्न गणेश परळीकर यांच्या मार्गदर्शनाखाली सहाय्यक आयुक्त विवेक पाटील, अन्नसुरक्षा अधिकारी गोपाळ कासार, योगेश देशमुख व वाहन चालक निवृत्ती साबळे यांनी केली.
