नवी दिल्ली (इंडिया दर्पण वृत्तसेवा) – सीबीआयने आज फूड कॉर्पोरेशन ऑफ इंडियाचे डीजीएम राजीव मिश्रा यांना आर्थिक गैरव्यवहाराच्या प्रकरणात अटक केली आहे. एफसीआयमधील गैरव्यवहार तसाही गेले काही दिवस चर्चेत होता. या प्रकरणात आज सीबीआयने काही शहरांमध्ये छापे टाकले व डीजीएमला अटकही केली.
पंजाब, हरियाणा आणि दिल्ली ही तीन राज्ये सीबीआयच्या रडारवर होती. त्यादृष्टीने सीबीआयने एफसीआयमधील घोटाळ्याप्रकरणी ५०हून अधिक ठिकाणी छापे मारले व मोठा ऐवज जप्त केला. मुख्य म्हणजे सीबीआयने राजीव मिश्रा यांना लाच घेताना रंगेहाथ पकडले होते. त्यानंतरच त्यांनी मोठ्या प्रमाणात छापे मारून कारवाई सुरू केली. सीबीआयने या घोटाळ्याशी संबंधित ७४ लोकांविरुद्ध गुन्हे दाखल केले आहेत. तर आतापर्यंत ६० लाख रुपये जप्त केले आहेत.
गेल्या काही दिवसांपासून एफसीआयचे अधिकारी आणि धान्य गिरण्यांच्या मालकांवर सीबीआयची नजर होती. संपूर्ण अंदाज घेऊन सीबीआयने आज कारवाई सुरू केली. विविध ठिकाणच्या छाप्यांमधून रोख रक्कम व कागदपत्रे जप्त करण्यात आली. यात पंजाब आणि हरियाणातील बरीच शहरे आणि दिल्लीतील दोन ठिकाणांचा समावेश आहे. सीबीआयच्या छाप्यांमुळे व कारवाईमुळे विभागातील अनेक अधिकाऱ्यांचे धाबे दणाणले आहेत. सीबीआयने अद्याप कारवाई पूर्ण झाल्याचे म्हटलेले नाही. त्यामुळे भविष्यात आणखी काही मोठे मासे सीबीआयच्या जाळ्यात अडकतील, अशी शंका व्यक्त होत आहे.
५० हजारांची लाच
फूड कॉर्पोरेशन ऑफ इंडिया (एफसीआय)चे उपमहाव्यवस्थापक राजीव मिश्रा यांच्यावर सीबीआयचे तसेही विशेष लक्ष होते. त्यांना तर सीबीआयने ५० हजारांची लाच घेताना रंगेहाथ अटक केली आहे.
FCI Scam CBI Raid Cash Gold Silver Seized Corruption