इंडिया दर्पण ऑनलाईन डेस्क – अनुराग कश्यपवर लैंगिक छळाचा आरोप करणारी अभिनेत्री रूपा दत्ता हिला चोरीच्या आरोपाखाली अटक करण्यात आली आहे. रूपा दत्ता ही बंगाली चित्रपट अभिनेत्री आहे. तिला आंतरराष्ट्रीय कोलकाता बुक फेअरमधून पैसे चोरल्याप्रकरणी अटक करण्यात आली आहे. मीडिया रिपोर्ट्सनुसार, रुपा पोलिसांना कचऱ्याच्या डब्यात पिशवी टाकताना दिसून आली. तिची संशयास्पद वर्तणूक पाहता तपासणी करण्यात आली व त्यानंतर अटक करण्यात आली आहे.
रूपाकडून ७५००० रुपये जप्त करण्यात आले आहेत. ही घटना रात्रीच्या सुमारास घडली. कोलकाता येथील विधाननगर उत्तर पोलीस स्टेशनने उघड केले आहे की घटनास्थळी उपस्थित असलेल्या पोलिसांनी एका महिलेला कचऱ्याच्या डब्यात प्लास्टिकची पिशवी फेकताना पाहिले. त्यानंतर त्याने याची माहिती इतर पोलिसांना दिली. पोलिसांनी महिलेची चौकशी केली असता ही अभिनेत्री रूपा दत्ता असल्याचे आढळून आले. तिच्या बॅगची झडती घेतली असता त्यातून पैशांनी भरलेली बॅग जप्त करण्यात आली. एकूण रक्कम ७५००० रुपये आहे. आता पोलिसांनी अभिनेत्रीला ताब्यात घेतले आणि न्यायालयात गेले. पोलिसांनी आरोपीची ओळख रूपा दत्ता अशी केली आहे. तिने काही काळापूर्वी निर्माता, दिग्दर्शक अनुराग कश्यपवर लैंगिक छळाचा आरोप केला होता. अनुराग कश्यपवर अश्लील मेसेजेस पाठवतो, असे तिचे म्हणणे होते. २०२०मध्ये रूपा दत्ताने हा आरोप केला होता पण नंतर असे आढळून आले की ती फेसबुकवर दुसऱ्या कोणाशी तरी संभाषण करत होती, ज्याचे पहिले नाव देखील अनुराग होते. अनुरागसोबत झालेल्या चॅटचे अनेक स्क्रीनशॉटही शेअर केले होते. त्यामुळे हा आरोप फेटाळून लावला गेला होता.
