खोट्या बातमीने अदानींना दिला तब्बल नऊ अब्ज डॉलरचा झटका; कसं काय?

विशेष प्रतिनिधी, मुंबई

माध्यमांच्या हातात किती मोठी ताकद आहे, याची प्रचिती देणाऱ्या घटना आपण नेहमीच बघत असतो. सुप्रसिद्ध उद्योगपती गौतम अदानी यांच्याबाबतीतही अलीकडेच असाच काहीसा प्रकार घडला आणि त्यात जगातील श्रीमंतांच्या यादीत आघाडीवर येण्याचे त्यांचे स्वप्नही लांबणीवर पडले.

अदानी ग्रृपच्या कंपन्यांमध्ये गुंतवणूक करणाऱ्या काही एफपीआय (FPIs) बाबत काही प्रश्न उपस्थित करणारी बातमी एका आघाडीच्या वर्तमानपत्रात प्रकाशित झाली. त्या बातमीमुळे अदानी ग्रृपच्या सहा लिस्टेड कंपन्यांचे शेअर धाडकन खाली आपटले.

ब्लूमबर्गच्या एका रिपोर्टनुसार, कंपन्यांचे शेअर घसरल्याने अदानी यांना या आठवड्यात नऊ बिलीयन डॉलर गमवावे लागले. त्यांची एकूण संपत्ती घटून आता ६७.६ बिलीयन डॉलरवर आली आहे. अर्थात शेअर बाजार बंद झाला तेव्हाची ही आकडेवारी आहे. नंतर आणखीही काही बदल मार्केटमध्ये झाले.

मुकेश अंबानीच्या अगदी जवळ

काही दिवसांपूर्वी अदानी हे आशियातील सर्वांत श्रीमंत व्यक्ती मुकेश अंबानी यांच्या अगदी जवळ पोहोचले होते. आता मात्र शेअर बाजारातील घडामोडींनंतर ते १५ स्थानावर घसरले आहेत.

अंबानी १२ व्या स्थानावर

रिलायन्स इंडस्ट्रीजचे चेअरमन मुकेश अंबानी श्रीमंतांच्या यादीत १२ व्या क्रमांकावर आहेत. त्यांची एकूण संपत्ती ८४.५ बिलीयन डॉलर एवढी आहे. या यादीत अमेझॉन डॉट कॉमचे जेफ बेझो (Jeff Bezos) पहिल्या क्रमांकावर आहेत. त्यांच्याकडे एकूण १९८ बिलीयन डॉलर एवढी संपत्ती आहे. तर फ्रान्सचे बमार्ड अर्नाल्ट १७८ बिलीयन डॉलर संपत्तीसह दुसऱ्या क्रमांकावर आहेत. आपल्या ट्वीटमुळे कायम चर्चेत राहणारे एलन मस्क यांच्याकडे १६७ बिलीयन डॉलर संपत्ती असून ते तिसऱ्या क्रमांकावर आहेत. मायक्रोसॉफ्टचे बिल गेट्स यांच्याकडे १४४ बिलीयन डॉलर संपत्ती असून ते चौथ्या क्रमांकावर तर फेसबुकचे मार्क झुकेरबर्ग पाचव्या क्रमांकावर आहेत.

या बातमीने केली गडबड

नॅशनल सिक्युरिटीज डिपॉझिटरी लिमीटेडने अदानी ग्रृपमध्ये गुंतवणूक करणाऱ्या तीन फॉरेन फंड्सचे अकाऊंट्स गोठवले आहेत, अशी ही बातमी होती. त्यानंतरच शेअर मार्केटमध्ये घडामोडी सुरू झाल्या. अर्थात त्यानंतर अकाऊंट्स गोठवलेले नाहीत, हे नंतर स्पष्ट करण्यात आले. पण तोपर्यंत जे व्हायचे ते होऊन गेले होते.