नाशिक (इंडिया दर्पण वृत्तसेवा) – ध्येय निश्चित असेल आणि आपली परिश्रम घेण्याची तयारी असेल तर यश मिळाल्याशिवाय राहत नाही. त्यामुळे ध्येय पक्के करा आणि ते साध्य करण्यासाठी कष्ट करत राहा असे उद्गार भारताचा माजी अष्टपैलू खेळाडू इरफान पठाण याने काढले. ते एसएमबीटी क्रिकेट कार्निव्हलच्या उद्घाटन प्रसंगी बोलत होते. यावेळी एसएमबीटी सेवाभावी संस्थेचे व्यवस्थापकीय विश्वस्त डॉ हर्षल तांबे यांच्यासह मान्यवर उपस्थित होते.
एसएमबीटी सेवाभावी ट्रस्टच्या शैक्षणिक संकूलात ‘एसएमबीटी फेस्ट २०२३’ या वार्षिकोत्सवाचे आयोजन करण्यात आले आहे. आज (दि २४) पासून या फेस्टची सुरुवात झाली आहे. फेस्टची सुरुवात विविध प्रकारच्या खेळांनी झाली आहे. या फेस्टचे आयोजन शनिवार दिनांक ४ मार्चपर्यंत आहे. यादरम्यान साहित्य, कला, क्रीडा आणि सांस्कृतिक कार्यक्रमांची रेलचेल असणार आहे.
एसएमबीटी सेवाभावी ट्रस्ट संचलित एसएमबीटी आयएमएस अॅण्ड आरसी मेडिकल कॉलेज, एसएमबीटी आयुर्वेद कॉलेज, एसएमबीटी कॉलेज ऑफ फार्मसी, डेन्टल कॉलेज संगमनेर, एसएमबीटी कॉलेज ऑफ नर्सिंग, एसएमबीटी हॉस्पिटल यांचा संयुक्त वार्षिकोत्सव एसएमबीटी ट्रस्टच्या धामनगाव, घोटी कॅम्पसमध्ये दरवर्षी मोठ्या जल्लोषात साजरा केला जातो.
गेली दोन वर्षे करोना प्रादुर्भावामुळे हा फेस्ट होऊ शकलेला नव्हता. त्यामुळे यंदाच्या फेस्टची उत्कंठा शिगेला पोहोचली होती. आज (दि २४) रोजी भारताचा माजी अष्टपैलू खेळाडू एसएमबीटी कॅम्पसमध्ये येताच मोठा जल्लोष विद्यार्थ्यांनी केला.
सुरुवातील कॉफी विथ इरफान हा महाविद्यालयीन विद्यार्थ्यांच्या कार्यक्रमाला इरफानने हजेरी लावली. यानंतर एसएमबीटी स्पोर्ट्स कॉम्प्लेक्स येथील क्रिकेट मैदानावर क्रिकेट सामन्यांचे उद्घाटन त्याच्या हस्ते झाले. यावेळी, तब्बल २२ क्रिकेट टीमच्या सदस्यांसोबत इरफानने हस्तांदोलन केले. यांनतर ग्राउंडवर उपस्थित विद्यार्थ्यानादेखील इरफान पठाणकडून सरप्राईज देण्यात आले.
दुसरीकडे, हिरवा शालू पसरलेले मैदान पाहून इरफानने बॅट हातात घेत उत्तुंग षटकारांची आतषबाजी केली. यावेळी मैदानाबाहेर जमलेल्या प्रेक्षकांनी एकाच जल्लोष केला. आजवर अनेक कार्यक्रमांना मी गेलो परंतु सर्वाधिक हस्तांदोलन मी एसएमबीटीमध्ये केले असून येथील परीसर आणि नाशिकविषयीचे प्रेम इरफानने यावेळी बोलून दाखवले. सुरुवातीला इरफानने काय मंडळी? कसे आहात? असे मराठीतून वाक्य म्हणत सर्वांनाच अवाक केले.
आजपासून २८ मार्चपर्यंत या क्रीडास्पर्धा होणार आहेत. क्रिकेट कार्निव्हलसोबतच टेबल टेनिस, महिलांसाठी क्रिकेट, व्हॉलीबॉल, कॅरम, फुटबॉल बास्केटबॉल, चेसदेखील आनंद विद्यार्थ्यांना घेता येणार आहे. यावेळी संस्थेचे बोर्ड मेंबर श्रीराम कुऱ्हे, अधिष्ठाता डॉ मीनल मोहगावकर, प्राचार्य डॉ. प्रदीप भाबड, प्राचार्य डॉ योगेश उशीर, किरण जगताप, प्राचार्या जोन्हा कोठारे, चीफ ऑफिसर मयूर रावल यांच्यासह अनेक मान्यवर व मोठ्या संख्येने शिक्षक शिक्षकेतर कर्मचारी व विद्यार्थी उपस्थित होते.
क्रिकेट कार्निव्हल असते दरवर्षी आकर्षण
या सामन्यासाठी तब्बल २२ वेगवेगळ्या टीम आहे. प्रत्येक टीममध्ये १५-१७ खेळाडू असून तब्बल एसएमबीटी परिवारातील ६०० पेक्षा अधिक सदस्यांचा यात सक्रीय सहभाग आहे. दरवर्षी कर्मचारी आणि विद्यार्थ्यांसाठी या सामन्यांचे आयोजन केले जाते. आचार विचारांची देवाण-घेवाण यानिमित्ताने होत असते.
पहिल्यांदाच डे-नाईट सामने
क्रिकेट म्हटलं की सर्वांच्याच आवडीचा खेळ. यंदा पहिल्यांदाच एसएमबीटी सेवाभावी संस्थेच्या शैक्षिणिक संकुलातील क्रिकेट सामने डे-नाईट स्वरुपात होत आहेत. हिरवा शालू पांघरलेल्या मैदानात दिवस रात्र सामने खेळवली जात असल्यामुळे अनोख्या प्रयोगामुळे सर्वदूर कौतुक होत आहे. येथील क्रिकेट सामन्यांचे अतिशय नियोजनबद्ध आयोजन झाले असून मैदानदेखील आंतरराष्ट्रीय सामन्यांच्या धर्तीवर सजविण्यात आले आहे.
Ex Cricketer Irfan Pathan Nashik Cricket Play
