येवला (इंडिया दर्पण वृत्तसेवा)- आज मतदानाचा दिवस असल्याने अतिशय उत्साहाने छगन भुजबळ हे येवला लासलगाव मतदारसंघातील विविध मतदान केंद्राना गाठीभेटी देत आहेत. नगरसुल येथे मात्र एक वेगळी घटना घडली. छगन भुजबळ आणि माणिकराव शिंदे यांची अचानक समोरासमोर भेट झाली. त्यावेळी भुजबळ यांनी शिंदे यांच्याशी हस्तांदोलन केले. तसेच भुजबळ आणि शिंदे यांनी एकमेकाला शुभेच्छा दिल्या. हे पाहून सारेच अचंबित झाले. दोन्ही उमेदवार एकमेकाविरोधात उभे असतानाही त्यांच्यातील अशा प्रकारचा अतिशय दिलखुलास संवाद पाहून अनेकांनी दोघांचे कौतुक केले.
विशेष म्हणजे, शिंदे यांच्यासह अनेकांनी वीस वर्षांपूर्वी छगन भुजबळ यांना येवल्यातून उमेदवारी करण्याचा आग्रह धरला. त्यानंतर भुजबळ यांनी तो मान्य केला. तेव्हापासून भुजबळ हे सलग चार वेळा येवल्यातून निवडून येत आहेत. मात्र यंदा निवडणुकीपूर्वी अचानक शिंदे यांनी भुजबळ यांची साथ सोडत त्यांच्या विरोधात उमेदवारी करण्याचा निर्णय घेतला. त्यानंतर आज ही भेट झाली व त्याची चर्चाही रंगली…
