मुंबई (इंडिया दर्पण वृत्तसेवा) – शिवसेनेविरोधात बंडखोरी करून मुख्यमंत्री झालेले एकनाथ शिंदे आता उद्धव ठाकरेंना नवा धक्का देणार आहेत. थोड्याच कालावधीत मुंबई महापालिकेसह राज्यातील अनेक महापालिका, नगरपालिका आणि जिल्हा परिषदांच्या निवडणुका होणार आहेत. या निवडणुकांमध्ये भाजपसोबत युती करून शिवसेनेचे मैदान हलवण्याची तयारी एकनाथ शिंदे यांनी सुरू केली आहे.
एकनाथ शिंदे गटातील सूत्रांनी दिलेल्या माहितीनुसार मुंबई, पुणे, नाशिक, औरंगाबादसह अनेक महापालिकांच्या निवडणुका भाजपसोबत लढवल्या जाणार आहेत. मुख्यमंत्री एकनाथ शिंदे यांच्या नेतृत्वाखाली शिंदे गट आणि भाजप आगामी महापालिका निवडणुका एकत्र लढणार हे जवळपास निश्चित झाले आहे. औरंगाबाद महापालिका निवडणुकीच्या निमित्ताने ही नवी युती असणार आहे. याचदृष्टीने शिंदे हे नाशिक आणि औरंगाबाद दौऱ्यावर जात आहेत.
सध्या भाजप आणि शिंदे गटामध्ये जागावाटपाबाबत प्राथमिक बैठक झाली आहे. शिंदे गटाचे औरंगाबाद जिल्हाध्यक्ष राजेंद्र जंजाळ यांनी ही माहिती दिली आहे. एकनाथ शिंदे आणि देवेंद्र फडणवीस यांच्या नेतृत्वाखाली सरकार स्थापन झाले आहे. त्यानंतर ही पहिलीच वेळ आहे, जेव्हा दोघेही आगामी महापालिका निवडणूक एकत्र लढणार आहेत. शिंदे यांनी यापूर्वीच औरंगाबादचे नाव बदलून छत्रपती संभाजीनगर करण्याची घोषणा केली आहे. औरंगाबादमधील शिवसेनेचे सहाही आमदार शिंदे यांच्या गटात सामील झाले आहेत. त्यामुळे शिवसेना आधीच अडचणीत आली आहे. हिंदुत्वाच्या मुद्द्यावर भाजप आणि शिंदे गट एकत्र निवडणुकांना सामोरे गेल्यास उद्धव ठाकरे यांच्या नेतृत्वाखालील शिवसेनेची मोठी कोंडी होऊ शकते.
औरंगाबादचे शिवसेनेचे आमदार उदयसिंह राजपूत, संजय शिरसाठ, रमेश बोरणारे, प्रदीप जैस्वाल, अब्दुल सत्तार, संदीपान भुमरे हे एकनाथ शिंदे यांच्यासोबत आहेत. महापालिका निवडणुकीतील जागावाटपाबाबत सध्या पहिली बैठक झाली आहे. बैठकांमध्ये संमत झालेल्या ठरावावर भाजपच्या हायकमांडशी चर्चा करून अंतिम फॉर्म्युला ठरवून निवडणुकीत उतरण्याची तयारी केली जाईल. मात्र, राज्य मंत्रिमंडळाच्या विस्ताराबाबत एकनाथ शिंदे गट आणि भाजपमध्ये अद्याप समझोता झालेला नाही. जवळपास तीन आठवडे उलटून गेले असून आजपर्यंत एकनाथ शिंदे आणि देवेंद्र फडणवीस यांच्याशिवाय एकाही मंत्र्याने शपथ घेतलेली नाही.
Eknath Shinde and BJP Strategy for Uddhav Thackeray Politics
