मुंबई (इंडिया दर्पण वृत्तसेवा) – छत्रपती शिवाजी महाराजांच्या पुतळ्याबाबत दुर्दैवी घटना घडली. मात्र त्याच राजकारण करण्यासाठी काही जण आज रस्त्यावर चालले. यानिमित्ताने ते घराबाहेर तरी निघाले याचा मला आनंद आहे. मात्र असेच ते इर्शाळवाडीच्या दुर्घटनेवेळी का नाही चालले, महापूर आला तेव्हा का नाही रस्त्यावर उतरले, कोरोना काळात लोकांना मदत करण्यासाठी का नाही रस्त्यावर उतरले असे प्रश्न आज लोकं विचारत आहेत असे मत मुख्यमंत्री एकनाथ शिंदे यांनी व्यक्त केले.
शिवसेना पक्षाच्या वतीने आयोजित करण्यात आलेल्या ‘उत्सव मुंबईचा सार्वजनिक गणेशोत्सव स्पर्धा २०२३’ च्या विजेत्यांना आज पारितोषिके देऊन सन्मानित करण्यात आले.यावेळी शालेय शिक्षणमंत्री दीपक केसरकर, माजी खासदार राहुल शेवाळे, शिवसेना नेते आनंदराव अडसूळ, शिवसेना, महिला आघाडी, युवासेनेचे सर्व प्रमुख पदाधिकारी, कार्यकर्ते आणि सार्वजनिक गणेशोत्सव मंडळाचे पदाधिकारी व कार्यकर्ते उपस्थित होते.
यावेळी मुख्यमंत्री म्हणाले की, राज्यात महायुती सरकारने गेल्या दोन वर्षात अनेक लोककल्याणकारी निर्णय घेतले. मुख्यमंत्री लाडकी बहीण योजना ही त्यातीलच एक योजना असून आतापर्यंत १ कोटी ६० लाख महिलांच्या खात्यात पैसे जमा केले आहेत. काही सावत्र भावांना या योजनेची लोकप्रियता सहन होत नाही, त्यामुळे नागपुरातील काँग्रेस कार्यकर्ते पुन्हा एकदा कोर्टत गेले आहेत. मात्र काहीही झाले तरीही ही योजना बंद होणार नसल्याचे याप्रसंगी निक्षून सांगितले.
