इंडिया दर्पण ऑनलाईन डेस्क
अमरावतीः अमरावतीमधल्या प्रचारसभेत मुख्यमंत्री एकनाथ शिंदे यांनी माजी खासदार नवनीत राणा आणि रवी राणा यांच्यावर निशाणा साधला आहे. ऐन निवडणुकीत राणा दाम्पत्य आणि विरोधकांमधील वाद उफाळून आल्याने शिंदे यांनी राणा दाम्पत्याला इशारा दिला आहे. महायुतीत राहून महायुतीविरोधात काम करणाऱ्यांची नोंद घेतली जाणार असल्याचेही ते म्हणाले. त्याअगोदर उपमुख्यमंत्री अजित पवार यांनीही राणा दांपत्यावर टीका केली होती.
अमरावती भाजप कार्यालयात काही दिवसांपूर्वी बडनेराचे उमेदवार रवी राणा यांची बैठक झाली. त्यामध्ये रवी राणा यांनी अमरावतीची एक जागा कमी झाली, तरी चालेल पण कमळ निवडून आले पाहिजे, असे वक्तव्य केले होते. राणा यांच्या वक्तव्यानंतर अजित पवारांकडून त्यांची कानउघडणी करण्यात आली. ‘राणा म्हणजे विनाशकाले विपरीत बुद्धीसारखे वागत आहेत. त्यांच्याबद्दल न बोललेले बरे. त्यांच्या अशा बोलण्यानेच लोकसभेला त्यांच्या पत्नीचा पराभव झाला, असे पवार यांनी म्हटले होते. त्यानंतर आता शिंदे यांनीही राणा दाम्पत्याचे कान टोचले आहेत.
“महायुती मजबुतीने लढत आहे. महायुतीत कोणीही मीठाचा खडा टाकण्याचे काम करू नका. मी राणा परिवारालाही सांगतो, की तुम्ही महायुतीचे घटक आहात. महायुतीत सरकार तुमच्या पाठीशी उभे राहिले आहे. सरकार आणण्यासाठी कॅ. अभिजीत अडसूळदेखील आपल्याला हवे आहेत. म्हणून आपणदेखील महायुतीची शिस्त पाळली पाहिजे. महायुतीत राहायचे आणि महायुतीच्या विरोधात काम करायचे हे कोणी करता कामा नये. मुख्यमंत्री म्हणून मी हे आवाहन करत आहे,” असे शिंदे यांनी म्हटले.
“दर्यापूर मतदार संघाचे उमेदवार अडसूळ यांच्यामध्ये काम करण्याची तळमळ आहे. न थकता काम करणाऱ्या अभिजीतला या ठिकाणी विजयी करायचे आहे. अमरावती जिल्ह्याच्या विकासासाठी आम्ही अनेक निर्णय घेतले आहेत. अमरावती जिल्ह्यात संत्रा इस्टेट उभारत आहे. वैनगंगा नळगंगा प्रकल्प या दोन प्रकल्पाला सरकारने मान्यता दिली आहे. कॅप्टन अभिजीत विधानसभेत पोहोचल्यास जिल्ह्याच्या विकासाला चालना मिळेल. लाडकी बहीण योजना सुपरहिट झालेली आहे. यामुळे विरोधकांची पायाखालची वाळू घसरलेली आहे. या लाडक्या बहिणीच महायुतीचे सरकार पुन्हा आणणार आहेत; मात्र सावत्र व दुष्ट भावांपासून सावध राहा,” असे आवाहन त्यांनी केले.
