जळगाव – जिल्हा बँकेच्या माजी अध्यक्षा रोहिणी खडसे (Rohini Khadse) यांच्यावर झालेल्या प्राणघातक हल्ल्यामुळं राष्ट्रवादी काँग्रेसचे नेते एकनाथ खडसे (Eknath Khadse) संतापले आहेत. हा कसला शिवसेनेचा आमदार? राष्ट्रवादी काँग्रेसचे जिल्हाध्यक्ष रवींद्र पाटील यांनी त्याग केला. राष्ट्रवादीचे कार्यकर्ते व पदाधिकाऱ्यांनी रात्रंदिवस मेहनत केली. त्यामुळे चंद्रकांत पाटील आमदार झाला, असे खडसे म्हणाले.
‘महिलांवरील अन्याय कदापी सहन करणार नाही
‘दोन दिवसांपूर्वी मी ऑडिओ क्लिप जारी केल्या होत्या. त्यातील लोक आणि हल्ला करणारे हे एकच असून हे गुंड प्रवृत्तीचे लोक आहेत. या गुंड प्रवृत्तीच्या लोकांची चौकशी झाली पाहिजे व त्यांच्यावर कठोर कारवाई होऊन शिक्षा झाली पाहिजे, अशी मागणी खडसे यांनी केली. ‘महिलांवरील अन्याय कदापी सहन करणार नाही. मी रोहिणी खडसे यांच्या पाठीशी भक्कमपणे उभा आहे, असंही त्यांनी ठणकावलं. रोहिणी खडसे यांच्यावर झालेला हल्ला, विनयभंगाच्या घटना व मुक्ताईनगरातील अवैध धंदे या प्रश्नांवर मुख्यमंत्री उद्धव ठाकरे यांची भेट घेणार असून संबंधितांवर योग्य कारवाई करण्याची मागणी करणार आहे, असं खडसे यांनी यावेळी सांगितलं.
हा कसला आमदार ?
चंद्रकांत पाटील यांच्यावर बोलताना खडसे म्हणाले, हा कसला शिवसेनेचा आमदार? राष्ट्रवादी काँग्रेसचे जिल्हाध्यक्ष रवींद्र पाटील यांनी त्याग केला. राष्ट्रवादीचे कार्यकर्ते व पदाधिकाऱ्यांनी रात्रंदिवस मेहनत केली. त्यामुळे चंद्रकांत पाटील आमदार झाला आणि हा स्वत:ला शिवसैनिक म्हणवून घेतो. चंद्रकांत पाटील निवडून आले, त्यावेळी भाजप सेनेची युती होती. या युतीशीही चंद्रकांत पाटलांनी गद्दारी केली आणि निवडून आले. आता राष्ट्रवादीच्या पदाधिकारी व कार्यकर्त्यांना छळत आहेत, असं खडसे म्हणाले.
