नवी दिल्ली (इंडिया दर्पण वृत्तसेवा) – उत्तर-पूर्व दिल्लीतील करावलनगर भागात शाळेतून घरी आल्यावर आठवीच्या विद्यार्थ्याने गळफास लावून घेतला. शिक्षकाच्या छळाला कंटाळून त्याने गळफास घेतल्याचा आरोप कुटुंबीयांनी केला आहे. तर, या मुलाने शाळेतील एका महिला शिक्षिकेला हॉट म्हटले होते. याप्रकरणी त्याला व त्याच्या कुटुंबीयांना शाळेत बोलावून धमकावण्यात आले, असा आरोप आहे.
वरिष्ठ पोलीस अधिकारी यांच्याकडून मिळालेल्या माहितीनुसार, अभिषेक (वय १४) कुटुंबासोबत जोहरीपूर, करावल नगर परिसरात राहत होता. त्यांच्या पश्चात वडील अशोक कुमार, आई सुनीता, मोठा भाऊ विवेक आणि एक लहान बहीण असा परिवार आहे. वडील अशोक कुमार हे खासगी नोकरी करतात, तर अभिषेक हा जवळच्याच सरकारी शाळेत आठवीचा विद्यार्थी होता.
एके दिवशी सकाळी स्कूलमधून फोन आला आणि अभिषेकबाबत तक्रार करत शिक्षकाने कुटुंबीयांना शाळेत येऊन भेटण्यास सांगितले. त्यानंतर अभिषेक भाऊ विवेकसोबत शाळेत पोहोचला. शाळेतील महिला शिक्षिकेला शिवीगाळ करताना अभिषेकने हॉट बोलल्याचे शाळेतील एका शिक्षकाने आरोप आहे. त्यानंतर शिक्षकाने आधी अभिषेकच्या भावाला आरोप करून माफीनामा लिहायला लावला. यानंतर त्यांनी अभिषेकचे नाव शाळेतून काढून टीसी देण्याचे सांगितले.
शाळेतून नाव कमी केल्यानंतर त्यांचा प्रवेश कोणत्याच शाळेत होणार नसल्याचेही या शिक्षकाने सांगितले. मात्र यानंतर घरी पोहोचल्यानंतर अभिषेकने जेवण केले. आणि तो दुसऱ्या मजल्यावरील त्याच्या खोलीत पोहोचला. काही वेळातच अभिषेकचा मृतदेह छ्ताला लटकलेला दिसला.
ही बाब पोलिसांना कळवण्यात आल्याने मृतदेह शवविच्छेदनासाठी पाठवून या प्रकरणाचा तपास सुरू केला.
दरम्यान, यापूर्वी शाळेतील एका शिक्षकाने अभिषेकवर मोबाईल चोरीचा आरोप केला होता. यानंतर अभिषेकवर शिवीगाळ केल्याचा आरोप करण्यात आला. मात्र अभिषेकने शिक्षिकेला कोणत्याही प्रकारे शिवीगाळ केल्याचा इन्कार केला होता.
