त्र्यंबकेश्वर (इंडिया दर्पण वृत्तसेवा) – दुगारवाडी धबधबा बघण्यासाठी गेलेल्या २२ पर्यटकांना रविवारी मध्यरात्री सुखरुप बाहेर काढण्यात आले. पाणी वाढल्यामुळे हे सर्व पर्यटक अडकून पडले होते. वेळीच मदत मिळाल्याने हे पर्यटक सुखरुप आहेत. अन्यथा मोठा दुर्दैवी प्रसंग घडला असता असे सांगण्यात येत आहे.
सध्या मुबलक पाऊस पडत असल्याने त्र्यंबकेश्वर परिसराचे निसर्ग सौदर्य खुलले आहे. अप्रतिम निसर्ग, डोंगरावरुन कोसळणारे धबधबे, खळखळुन वाहणारे नद्यानाले, ओहोळ बघण्यासाठी हजारो पर्यटक इकडे वळत आहे. परिसरातील प्रसिध्द दुगारवाडी धबधबा पाहण्यासाठी दरवर्षी अनेक पर्यटक गर्दी करत असतात. पावसाळ्यात या धबधब्याचे सौंदर्य पाहण्यासाठी पर्यटक मोठी गर्दी करत असतात. तथापी रविवारी पावसाचा जोर वाढला असताना देखील धबधब्यावर पिकनिकसाठी जाण्याचा अट्टहास काही पर्यटकांच्या अंगलट आला.
काल रविवारच्या सुट्टीच्या निमित्तानं धबधबा पाहण्यासाठी काही पर्यंटकांनी गर्दी केली होती. धबधब्याचं सौंदर्य आणखी जवळून पाहता यावं यासाठी त्यांनी आणखी जवळ जाण्याचं धाडस केलं. आणि या पर्यटकांचं हेच धाडस अंगलट आलं. मुसळधार पाऊस, अचानक वाढलेली पाण्याची पातळी आणि अंधार यांमुळे पर्यटक अडकले होते. मोबाईलला रेंज नसल्यानं संपर्कही होत नव्हता. स्थानिक पर्यटक तेथुन वर आल्यावर त्यांचेमार्फत पर्यटक अडकल्याची माहिती प्रशासनापर्यंत पोहोचली आणि बचावकार्य सुरु झालं. रात्री ८ नंतर रेस्क्यू ऑपरेशन सुरू झालं. पाऊस, अंधार यांमुळे बचाव कार्यात अडथळे येत होते. पण अखेर प्रशासनाना पर्यटकांना सुखरुप बाहेर काढण्यात यश आलं. तरीही एका पर्यटकाचा मात्र अद्याप शोध सुरु आहे.
स्थानिक ग्रामस्थ, नाशिक क्लाइंबर अँड रेस्क्यू असोसिएशन, वन विभाग, महसूल व पोलीस प्रशासन यांनी खडतर प्रयत्न केले. सदर बचाव कार्या करीता नाशिक उपवनसंरक्षक रेड्डी, नाशिक ग्रामीण अपर पोलीस अधीक्षक माधुरी कांगणे, इगतपुरी – त्र्यंबक उपविभागीय अधिकारी तेजस चव्हाण, उपविभागीय पोलिस अधिकारी कविता फडतरे, तहसिलदार दीपक गिरासे, पोलीस निरीक्षक संदीप रणदिवे, निवासी नायब तहसीलदार स्वप्निल सोनवणे, वन परिक्षेत्र अधिकारी पवार, मंडळ अधिकारी हेमंत कुलकर्णी, जाधव व तलाठी यांनी विशेष परिश्रम घेतले. दरम्यान अविनाश गरड, रा. आंबेजोगाई, जि-बीड हे वाहून गेलेले असल्याने त्यांचा शोध घेवूनही ते रात्री मिळून आलेले नाहीत, त्यासंदर्भात शोधकार्य आज सकाळी सुरू करण्यात आले आहे.
Dugarvadi Waterfall 22 Tourist Rescue Operation
