रांची (झारखंड) – येथे कुत्रा चोरीला गेल्याची नुसती तक्रार दाखल झाली नाही तर एफआयआरसुद्धा दाखल करण्यात आला. रातू रोड इंद्रपुरी येथील श्रेयस कुमार याचे वडील संजय कुमार यांनी पोलिसांमध्ये ही तक्रार दाखल केली आहे. एवढेच नाही तर कुत्र्याला शोधून देणाऱ्याला ११ हजार रुपयांचे बक्षीसही जाहीर करण्यात आले आहे.
श्रेयस याने माध्यमांना दिलेल्या माहितीनुसार काही दिवसांपूर्वी संध्याकाळी सात वाजता कुत्रा रस्त्यावर फिरत होता. त्याचवेळी स्कुटीवर दोन तरुण आले आणि कुत्र्याला उचलून फरार झाले. दोन्ही तरुणांनी टोपी घातलेली होती. बराचवेळ त्यांचा शोध घेण्याचा प्रयत्न करूनही चोर सापडले नाही म्हणून पोलीस स्टेशनला तक्रार दाखल करण्यात आली. अर्थात त्यानंतरही दोन दिवस झाले कुत्रा मिळालेला नाही. सध्या पोलीस आरोपींचा शोध घेत आहेत.
याला म्हणतात प्रेम
कुत्र्यावर मालकाचे किती प्रेम असावे याची प्रचिती देणारी ही घटना आहे. कुत्र्याला सुखरुप घरी आणून देणाऱ्याला ११ हजार रुपयांचे बक्षीस देण्यात येईल असे मालकाने जाहीर केले आहे. कुत्र्याचे वय जवळपास ४ वर्षे असून त्याचे नाव डुगू असे आहे.
