नाशिक (इंडिया दर्पण वृ्त्तसेवा) बीड जिल्ह्याच्या प्रथम महिला जिल्हाधिकारी म्हणून ज्यांनी आपल्या प्रशासकीय कारकीर्दीची सुरुवात केली, व आपल्या कामाचा ठसा उमटवला. त्या दीपा मुधोळ- मुंडे यांची राज्याच्या समाज कल्याण विभागाच्या आयुक्तपदी नुकतीच नियुक्ती झाली आहे. दीपा मुधोळ- मुंडे यांच्या रूपाने समाज कल्याण विभागाला पहिल्या महिला आयुक्त लाभल्या आहेत. नुकताच आयुक्त पदाचा कार्यभार स्वीकारला असून त्यांनी आपल्या कामाची चूनुक दाखवून दिली आहे. त्यांनी ऑन फिल्ड कामावर भर दिला असून राज्यात विविध कार्यालयांना भेटी देऊन आढावा घेतला आहे. जुलै 2025 मध्ये त्यांची समाज कल्याण विभाग, पुणे (Commissioner, Social Welfare Department) या महत्त्वाच्या पदावर नियुक्ती झाली आहे. या नवीन जबाबदारीत समाजातील वंचित घटकांसाठी राबवल्या जाणाऱ्या योजनांची परिणामकारक अंमलबजावणी आणि सुधारणा यावर त्यांनी काम सुरू केले आहे. विशेषता बीड जिल्ह्यात ऊसतोड कामगार व त्यांचे प्रश्न त्यांनी जाऊन बघितलेले आहे. समाज कल्याण विभागाकडेच ऊसतोड कामगारांचा विभाग असल्याने ऊसतोड कामगारांना यानिमित्ताने नवीन आशा निर्माण झाली आहे.
कठोर शिस्त, स्पष्ट दृष्टीकोन आणि प्रत्यक्ष लोकसंपर्क ही दीपा मुधोळ-मुंडे यांच्या कार्यशैलीची वैशिष्ट्ये आहेत. प्रशासकीय जबाबदाऱ्या सांभाळताना त्या केवळ धोरणनिर्मितीत मर्यादित न राहता स्वतः मैदानात उतरतात, हा त्यांचा वेगळेपणा आहे. त्यामुळे ज्या विभागाची जबाबदारी त्यांच्या हाती जाते, त्या विभागात कार्यक्षमतेची नवी उंची गाठली जाते, अशी प्रशासकीय वर्तुळातील बोलले जाते. त्याचाच प्रत्यय राज्याचा समाज कल्याण विभाग सध्या घेत आहे. समाज कल्याण विभागात विद्यार्थ्यांची शासकीय वसतीगृह, शासकीय निवासी शाळा व शिष्यवृत्ती हे महत्त्वाचे विषय असल्याने आयुक्त यांनी त्यांना प्राधान्य दिले आहे. विद्यार्थी शैक्षणिक हक्कांपासून वंचित राहू नये यासाठी त्यांनी विशेष प्रयत्न चालविला आहे.
भारतीय प्रशासन सेवेत (IAS) २०११ च्या बॅचमधून महाराष्ट्र कॅडरमध्ये दाखल झालेल्या दीपा मुधोळ-मुंडे यांनी गेल्या काही वर्षांत आपल्या कुशल कार्यशैली, निर्णयक्षमते आणि प्रत्यक्ष जनसंपर्कातून वेगळी ओळख निर्माण केली आहे. बीड जिल्ह्याच्या जिल्हाधिकाऱ्यांपासून सुरुवात करून त्यांनी स्थानिक विकास योजनांवर लक्ष केंद्रित केले. प्रशासनातील तळागाळाशी थेट संवाद साधण्यावर त्यांचा भर राहिला. ग्रामीण भागातील पायाभूत सुविधा, पाणीपुरवठा आणि शासकीय योजनांची अंमलबजावणी यावर त्यांनी प्रभावी कामगिरी केली.
जुलै २०२४ मध्ये पुणे महानगर परिवहन महामंडळ (PMPML) या महत्त्वाच्या संस्थेच्या अध्यक्ष व व्यवस्थापकीय संचालक (CMD) पदाची जबाबदारी त्यांच्याकडे होती. पुण्यातील प्रवाशांसाठी विश्वासार्ह व आधुनिक सार्वजनिक वाहतूक व्यवस्था उभी करण्यासाठी त्यांनी पुढाकार घेतला होता. त्यांच्या कार्यकाळात त्यांनी प्रत्यक्ष PMPML बसमध्ये प्रवास करून प्रवाशांचे अनुभव जाणून घेतले आणि विभागीय अधिकाऱ्यांसोबत वारंवार बैठक घेऊन प्रकल्पांचे पुनरावलोकन केले. बस रिअल-टाइम ट्रॅकिंग, मोबाईल अ‍ॅप सुधारणा, तसेच BRT मार्गावरील सेवांची गुणवत्ता वाढविण्यावर त्यांनी विशेष भर दिला.
दीपा मुधोळ-मुंडे हे एक कुशल आणि वेगवान प्रशासनिक अधिकारी, ज्यांनी PMPML सारख्या आव्हानाच्या भागात नेतृत्व केले, तेही प्रवाशांच्या हितासाठी. बीड जिल्ह्यात कार्यरत असताना आणि बीडच्या कलेक्टर पदावर असताना त्यांनी स्थानिक प्रशासकीय कामातही महत्त्वपूर्ण वाटा उचलला. व आता त्यांच्या कामाचे सातत्य हे समाज कल्याण विभागात पहावयास मिळत आहे. त्यांच्या स्थानांतरणाने त्यांनी समाजाभिमुख धोरणात्मक योजनांवर काम करायला सुरुवात केली आहे.
व्हिजन २०४७ सादर करणार
राज्याच्या समाज कल्याण विभागांकडे समाजातील सर्व वंचित ,उपेक्षित घटकांच्या विकासाची संबंधित विषय आहेत. त्या सर्व समाज घटकांच्या व अनुसूचित जाती व बौद्ध समाजाच्या सर्वांगीण विकासासाठीसमाज कल्याण विभाग कटीबद्ध आहे. त्यासाठी लवकरच आम्ही विभागाचे व्हिजन २०४७ सादर करणार आहोत.
दीपा मुधोळ-मुंडे, आयुक्त, समाज कल्याण विभाग महाराष्ट्र राज्य, पुणे.
