दिंडोरी (इंडिया दर्पण वृत्तसेवा)– दिंडोरी शिवारातील बदादे वस्तीवर बिबट्याच्या हल्ल्यात एका शेतकरी महिलेचा मृत्यू झाल्याची घटना घडली आहे. जनाबाई जगन बदादे वय ६५ मयत शेतकरी महिलेचे नाव आहे.
दरम्यान, दिंडोरी शहर परिसरात बिबट्याच्या हल्ल्यात तिसरा बळी गेल्याने तीव्र संताप उसळला असून, मयत महिलेचे नातेवाईक ग्रामस्थांनी वनविभागाच्या कार्यालयासमोर मृतदेह आणत संताप व्यक्त करत नाशिक कळवण रस्त्यावर रास्ता रोको केला. पोलीस आणि नातेवाईक यांच्यात संघर्ष सुरु झाला. पोलिस निरीक्षक रघुनाथ शेगर यांनी नागरिकांची समजूत काढल्यानंतर रास्ता रोको मागे घेण्यात आला. सुमारे दीड तास रास्ता रोको सुरु असल्याने मोठी वाहतूक कोंडी झाली.
याबाबत अधिक माहिती अशी की, जनाबाई जगन बदादे या दुपारी चारच्या सुमारास आपल्या शेतातील घराजवळ शेतात कोथंबीर काढणी करत असताना शेजाराच्या उसाच्या शेतात दडून बसलेल्या बिबट्या ने हल्ला केला व उसात ओढून नेले आजीने हल्ला होताच आरडा ओरड केल्याने त्यांचा मुलगा संजय व इतर नातेवाईकांनी धाव घेत बिबट्याला पिटाळून लावले. मात्र या हल्ल्यात आजी मरण पावल्या. ग्रामीण रुग्णालय परिसरात नातेवाईकांनी मोठा आक्रोश करत संताप व्यक्त केला.
ऐन रक्षाबंधन, जागतिक आदिवासी दिनाच्या दिवशी झालेल्या या घटनेने सर्वत्र हळहळ व्यक्त होत असून वनविभागाने बिबट्या शोध मोहीम राबवत पिंजरे लावण्याची मागणी होत आहे.
