मुंबई (इंडिया दर्पण वृत्तसेवा) – पंजाब नॅशनल बँकेची फसवणूक प्रकरणातील मुख्य फरार आरोपी आणि हिरे व्यापारी मेहुल चोक्सीला बेल्जियममध्ये अटक करण्यात आली आहे. भारतीय सुरक्षा एजन्सींच्या विनंतीवरुन चोक्सीला अटक करण्यात आली आहे. सीबीआयने बेल्जियममधील सरकारकडे विनंती केली होती. त्यानंतर शनिवारी ही अटक झाल्याची माहिती समोर आली आहे.
मेहुल चोक्सीने पंजाब नॅशनल बँकेकडून १३ हजार ५०० कोटी रुपयांचा कर्ज घोटाळा केला होता. त्यानंतर चोक्सी व इतरांविरुद्ध १५ फेब्रुवारी २०१८ रोजी गुन्हा दाखल झाला. केंद्रीय गुन्हे अन्वेषण विभाग(सीबीआय) ने मेहुल चोक्सी आणि इतरांविरुद्ध भारतीय दंड संहितेच्या १२०-बी, ४०९, ४२०, ४७७ ए, २०१ आणि १९८८ च्या दंड संहिता कायद्याच्या ७ आणि १३(२), १३(१)(सी) आणि(डी) या कलमांतर्गत दोन आरोपपत्रे आधीच दाखल केली आहेत. त्यानंतर २०२२ मध्ये सीबीआयने बँक आणि वित्तीय संस्थांची फसवणूक केल्याबद्दल चोक्सी आणि इतरांविरुद्ध आणखी पाच फौजदारी खटले दाखल केले.
नॅशनल सेंट्रल ब्युरो या नात्याने सीबीआयने फेब्रुवारी २०१८ मध्ये चोक्सीला शोधण्यासाठी सहकार्य करण्याबाबत विनंती केली. परदेशी कायदा अंमलबजावणी संस्थांच्या थेट समन्वयाने त्याच्या हालचालींवर सीबीआयने नजर ठेवली. तेव्हा तो अँटिग्वा आणि बारबुडा येथे भूमिगत होता. त्यानंतर चोक्सी विरुद्ध प्रत्यार्पणाची विनंती अँटिग्वा आणि बारबुडाच्या अधिकाऱ्यांना राजनैतिक माध्यमातून ऑगस्ट, २०१८ मध्ये पाठवण्यात आली होती.
