नाशिक (इंडिया दर्पण वृत्तसेवा)- नाशिक कृषी उत्पन्न बाजार समितीचे विद्यमान सभापती व माजी खासदार देवीदास पिंगळे यांच्या विरोधात १८ पैकी १५ सदस्यांनी अविश्वास ठराव दाखल केला आहे. भाजपचे शिवाजी चुंभळे यांच्या नेतृत्वाखाली या सर्व सदस्यांनी जिल्हाधिकारी कार्यालयात येऊन हा ठराव दाखल केला. देविदास पिंगळे यांचा कारभार मनमानी असून त्याविरोधात संचालकांनी विरोध दर्शवला आहे.
पिंगळे हे राष्ट्रवादी अजित पवार गटाचे असून त्यांच्यावर अविश्वास ठराव दाखल करणारे बहुतांश सदस्य त्यांच्या पॅनलमधून निवडून आल्याचे बोलले जात आहे. दरम्यान हा ठराव दाखल केल्यानंतर देविदास पिंगळे यांनी गिरीश महाजन यांच्यावर गंभीर आरोप केला आहे.
गिरीश महाजन हे नाशिकचे पालकमंत्री होणार असल्याने यंत्रणा हातात घ्यायला सुरुवात केली आहे. पोलिस बंदोबस्तात बाजार समितीच्या संचालकांना जिल्हाधिकारी कार्यालयात नेण्यात आले. प्रत्येक संचालकांना ५० लाख रुपये देऊन फोडले. सर्व घडामोडी मागे गिरीश महाजन असल्याचा गंभीर आरोप देविदास पिंगळे यांनी केला आहे. त्याचप्रमाणे त्यांनी उपमुख्यमंत्री अजित पवार यांची भेट घेऊन याबाबत तक्रार करणार असल्याचेही सांगितले.
