इंडिया दर्पण ऑनलाईन डेस्क
मुंबईः उत्तर प्रदेशचे मुख्यमंत्री योगी आदित्यनाथ यांनी महाराष्ट्रातील विधानसभा निवडणुकीच्या प्रचारदरम्यान केलेल्या एका वक्तव्यामुळे मोठे राजकीय वादंग उठले आहे. आदित्यनाथ यांनी प्रचारादरम्यान ‘बटेंगे तो कटेंगे’ अशी घोषणा देत जनतेला सावधानतेचा इशारा दिला होता. त्यापासून भाजपतील पंकजा मुंडे, अशोक चव्हाण यांच्यासह राष्ट्रीय लोकशाही आघाडीतील अजित पवार आणि उत्तर प्रदेश, बिहारमधील अन्य नेत्यांनी दूर राहायचे ठरवले आहे. फडणवीस यांनी योगी यांच्या विधानांची पाठराखण करताना संबंधित नेत्यांना जनभावना समजल्या नसतील, अशी अप्रत्यक्ष टीका केली आहे. त्यांच्या मुलाखतीनंतरही अजितदांनी ‘बटेंगे तो कटेंगे’ महाराष्ट्रात चालणार नाही, असे ठणकावले आहे.
आदित्यनाथ यांच्यावर ‘बटेंगे तो कटेंगे’ वरून टीका सुरू झाली; मात्र भाजप नेत्यांनी व शिवसेनेच्या शिंदे गटाच्या नेत्यांनी योगींचा हा नारा उचलून धरला आहे. महायुतीमधील राष्ट्रवादी काँग्रेसने मात्र ते या घोषणेशी सहमत नाहीत, असे स्पष्ट केले आहे. त्यापाठोपाठ भाजप नेत्या पंकजा मुंडे यांनी अशा घोषणेची आवश्यकता नसल्याचे सांगितले आणि नंतर त्यावरून घूमजावही केले. खासदार अशोक चव्हाण यांनीही या घोषणेपासून स्वतः ला दूर ठेवले आहे. दुसरीकडे पंतप्रधान नरेंद्र मोदी यांनी ‘एक हैं तो सेफ हैं’असा नारा दिला; मात्र या दोन घोषणांमुळे महायुतीत जुंपली आहे. फडणवीस यांनी आदित्यनाथ यांची घोषणा उचलून धरली आहे, तर मोदी यांच्या घोषणेला महामंत्र म्हटले आहे;परंतु अजित पवार मात्र याविरोधात आहेत. यावर आता फडणवीस यांनी प्रतिक्रिया दिली आहे.
एका मुलाखतीत ते म्हणाले, “या लोकांना (अजित पवार व पंकजा मुंडे) जनतेच्या भावना समजल्या नसतील. त्यांना काहीतरी वेगळे बोलायचे असेल आणि तुम्ही प्रसारमाध्यमांनी काहीतरी वेगळा अर्थ घेतला असेल किंवा त्यांना योगींच्या वक्तव्याचा अर्थ समजला नसेल. हे लोक योगींशी असहमत असण्यामागे या तीनपैकी एखादे कारण असू शकते. अजित पवारांबद्दल बोलायचे झाल्यास ते गेल्या अनेक दशकांपासून अशा विचारांच्या लोकांबरोबर राहिले आहेत, जे स्वतःला सेक्युलर (धर्मनिरपेक्ष) म्हणवून घेत आले आहेत. त्यांची विचारसरणी धर्मनिरपेक्ष असल्याचे सांगत आले आहेत. त्यांचे धर्मनिरपेक्ष असणे म्हणजे हिंदूविरोधी असण्यासारखे आहे. हिंदुत्वाचा विरोध म्हणजेच धर्मनिरपेक्षता अशी विचारधारा असलेल्या लोकांबरोबर अजित पवार गेल्या अनेक वर्षांपासून राहिले आहेत. त्यामुळे जनतेचा मिजाज (कल) समजून घेण्यासाठी त्यांना थोडा वेळ लागेल.
‘बटेंगे तो कटेंगे’ या घोषणेचा, तर, त्याचा अर्थ समाजाला एकत्र ठेवणे असा आहे. यात काहीही चुकीचे नाही. मोदी यांच्या ‘एक है तो सेफ है’ या घोषणेला महामंत्र म्हटले. कारण मोदी यांनी संपूर्ण समाजाला एकत्र ठेवण्यासाठी एक मंत्र दिला आहे. आपण एकत्र राहिलो तरच आपला विकास होईल, असा त्यामागचा अर्थ आहे. काँग्रेस मात्र आपल्याला वेगळे करण्याचा प्रयत्न करत आहे, असे फडणवीस म्हणाले.
