देवळा : जलजीवन मिशन अंतर्गत प्रत्येक घरापर्यंत पाण्याची सुविधा पोहोचविण्यासाठी चांदवड देवळा मतदारसंघातील ४६ गावांसाठी २०२१-२४ च्या कृती आराखड्यातील पाणीपुरवठा योजनेसाठी ३९.२० कोटीची मंजूरी प्राप्त झाल्याची माहिती आमदार डॉ.राहुल आहेर यांनी शुक्रवारी दिली.
याबाबत बोलताना आमदार डॉ.आहेर यांनी सांगितले की, जलजीवन मिशन ही केंद्राची योजना असून यामुळे तहानलेल्या गावातील प्रत्येक घरापर्यंत पाणी पोहोचणार आहे. पूर्वीच्या शासन निर्णयानुसार दर दिवशी प्रति माणसी ४०लीटर ने पाणीपुरवठा करण्यात येत होता परंतु जलजीवन मिशनअंतर्गत आता तो ५५ लीटर करण्याचे शासनाचे उद्दिष्ट आहे. या योजनेसाठी चांदवड तालुक्यातील २९ गावांसाठी २०.५० कोटी रुपये तर देवळा तालुक्यातील १७ गावांसाठी १८.७० कोटी रुपयाच्या आराखड्यास मंजूरी मिळाली आहे.
याशिवाय या योजनेंतर्गत जुन्या पाणीपुरवठा योजनांच्या सुधारात्मक पुर्नजोडणी तसेच पाण्याचे स्रोत बळकटीकरण तसेच पंप बदलणे, पाईपलाईन, जलकुंभ अशा इतर कामांसाठी अ आणि ब असे दोन भाग करण्यात आले आहेत. त्यात भाग अ मधील कामांसाठी चांदवड तालुक्यातील १३ गावे घेण्यात आली असून ५.९६ कोटी रु. व देवळा मधील १४ गावांसाठी ६.०१ कोटी रुपयांची तरतूद आहे. तसेच भाग ब मध्ये चांदवड तालुक्यात २१ गावांसाठी १२.६१ कोटी रु. तर देवळा तालुक्यातील सात गावांसाठी २.९५ कोटी रुपयांची तरतूद आहे. या योजनेमुळे ‘हर घर नल में पानी’ म्हणजेच प्रत्येक कुटुंबाला नळाद्वारे पाणीपुरवठा होणार आहे. मतदारसंघातील १०१ गावांना या योजनेचा लाभ मिळणार असल्याने या गावांची तहान मागण्यास मदत होणार आहे.
चांदवड तालुक्यातील गावे
चांदवड तालुक्यातील गावे पुढील प्रमाणे भोयेगाव,भुत्याणे,बोपाने,दहेगाव,दरेगाव,डोंणगाव,गोहरण,हिरापुर, जोपूळ, कुंदलगाव,शेरीसालायब न,कातरवाडी,मालसाणे, मेसनखेडे खु. मेसनखेडे बु.नांदूरटेक,निंबाळे,निमोण,इंदिरानगर(पारेगाव),परसुल,पिंपळद, तळेगाव रोही,वाद,वराडी,वडगाव पंगू,वडनेरभैरव -वस्त्या,विटावे, रापली,वागदर्डी.
देवळा तालुक्यातील गावे
देवळा तालुक्यातील गावे पुढील प्रमाणे भऊर,फुलेमाळवाडी,गिरणारे, कुंभार्डे,सांगवी,गुंजाळनगर , काचणे,खामखेडा,माळवाडी, मटाणे,मेशी,सरस्वतीवाडी, श्रीरामपूर,वासोळ,विठेवाडी, वाखारी, वरवंडी
Follow India Darpan
ताज्या बातम्या आणि चर्चांसाठी आमच्या सोशल मीडियावर जोडा!
ग्रामीण ते शहरी आणि जुन्या ते नव्या अशा सर्वच पातळीवर आम्ही विकास पत्रकारितेला अधिक महत्त्व देतो. समाजोन्नती व्हावी, लोकशाही बळकट व्हावी, अन्यायाला वाचा फोडावी आणि विधायक कार्य घडावे यासाठी आम्ही आग्रही आहोत.
