नवी दिल्ली – दिल्लीसह देशातील अनेक शहरांमध्ये दहशतवादी हल्ले करण्याचा कट रचणारा दहशतवादी मोहम्मद अशरफ धर्माच्या नावावरून भारतीय युवकांना जिहादी बनवण्याचेही काम करत होता. पीर मौलवी बनून तो घरात घुसत होता. भारतातील अनेक युवकांना त्याने जिहादी बनवले आहे. दहशतवादी प्रशिक्षणासाठी त्याने अनेक युवकांना पाकिस्तानात पाठवले असल्याचे बोलले जात आहे.
विशेष सेलच्या वरिष्ठ पोलिस अधिकार्यांनी सांगितले, की पीर मौलवी बनून तो कुराणमधील आयत वाचत होता आणि रुग्णांवर इलाज करण्याचा दावा करत होता. युवकांना जिहादी बनवण्यासाठी त्याने जादू-टोणाही शिकला होता. त्याने सांगितल्याप्रमाणे दिल्लीतील कालिंदी कुंज येथे यमुना घाटच्या किनार्यावरून पोलिसांनी एके ४७ आणि दारूगोळा जप्त करण्यात आला.
मोहम्मद अशरफ हा पीर मौलवी बनून उपचार करण्याची बतावणी करत घरात घुसत होता. अंधश्रद्धेचा गैरफायदा घेऊन तो उपचार करण्याचा दावाही करत होता. त्यानंतर तो घरातील युवकांना धर्माच्या नावार जिहादी बनण्यासाठी भडकवत होता. सर्वांना मुस्लिम धर्मात सहभागी करून घ्यायचे आहे, असे तो सर्वांना सांगत होता.
अशरफने किती युवकांना जिहादी बनवले आहे आणि त्याने किती युवकांना पाकिस्तानात प्रशिक्षणासाठी पाठवले आहे, याचा तपास पोलिसांचे विशेष पथक करत आहे. धार्मिक कामांसाठी तो श्रीमंत नागरिकांकडून देणग्याही घेत होता. हा पैसा तो स्लीपर सेलसाठी लागणार्या कामात खर्च करत होता. त्याने अनेक नागरिकांकडून देणगी घेतली आहे. जास्तीत जास्त युवकांना जिहादी करण्याच्या प्रयत्नाचा भाग म्हणून तो एकाच ठिकाणी जास्त दिवस राहात नव्हता. तो झटपट आपली ठिकाणे बदलत होता.
अटक केलेल्या अशरफने बिहारच्या एका पत्त्यावर भारतीय नागरिक असल्याचे कागदपत्रे बनविले होते. ओळखपत्र, मतदानकार्ड, शिधापत्रिका, पासपोर्ट दिल्लीच्या पत्त्यावर काढून ठेवले होते. ही कागदपत्रे बनविण्यासाठी त्याने बिहारमधील एका व्यक्तीकडून मदत घेतली होती. भारतीय पासपोर्टवर आरोपी अशरफने साऊदी अरब आणि थायलंडचा प्रवासही केला आहे. परंतु तो तिथे कशासाठी गेला होता याचा तपास भारतीय गुप्तचर यंत्रणा तपास करत आहेत.
